Drejtori i Financave në Gjilan akuzon qeverisjen e Lutfi Hazirit se nuk ua dërgoi mbi 43 mijë euro të dëmtuarve nga tërmeti në Shqipëri

Drejtori i Drejtorisë për Buxhet dhe Financa në Gjilan, Riad Rashiti, ka akuzuar qeverisjen e kaluar se nuk i kishte dërguar dhjetëra mijëra euro të mbledhura për të dëmtuarit nga tërmeti në Shqipëri.

Rashiti tha se bëhet fjalë për fondin prej 43 mijë e 761 euro që ishte organizuar nga Komuna më 21 dhjetor 2019 në kuadër të Gala Mbrëmjes “Pak nga Ne shumë për Ata”.

“I gjithë kontributi i donatorëve të vullnetit të mirë, për më shumë se dy vite ka mbetur në llogarit bankare të organizatorëve të kësaj mbrëmje, deri më 02 dhjetor 2021 kur janë transferuar në llogari të buxhetit komunal”, ka shkruar Rashiti në rrjetin social Facebook.

Drejtori tha se mosdërgesa e kësaj ndihme në Shqipëri është e papranueshme.

“Prej “Pak nga Ne e shumë për Ata” deri sot “Krejt në llogari bankare e Aspak për Ata”. Asnjë arsyetim nuk mund të ekzistoj për mos dërgesën e këtij fondi për familjet e rrënuara nga tërmeti”, ka thënë më tutje ai.

KALLXO.com ka provuar të kontaktojë me ish-kryetarin e Gjilanit, Lutfi Haziri, mirëpo ai nuk ishte i qasshëm.