Plagosja në Podujevë, Foto: KALLXO.com
Drejtori i Emergjencës së QKUK-së: Nga Podujeva janë sjellë tre të plagosur
Tre persona janë duke u trajtuar në Qendrën Klinike Universitare të Kosovës pas plagëve të marra në një incident me armë zjarri që ka ndodhur sot në Podujevë.
Gjendja e të plagosurve për momentin është stabile.
Këtë e ka konfirmuar për KALLXO.com, drejtori i Emergjencës së QKUK-së , Naser Syla.
“Tre të plagosur janë, gjendja e tyre është stabile për momentin, dy janë jashtë rrezikut për jetë, një është më në rrezik por në gjendje stabile”-ka thënë ai.
Një plagosje me armë zjarri ka ndodhur sot në Podujevë.
KALLXO.com ka siguruar pamje nga vendi i ngjarjes, ku shihet reagimi i shpejtë i Policisë dhe ambulanca.
Pamjet shfaqin që një person ka qenë i shtrirë në tokë dhe se Policia ka arritur që ta arrestojë një person.
Zëdhënës i Policisë së Kosovës për rajonin e Prishtinës, Agron Borovci ka thënë se të plagosuri janë dërguar për trajtimin e nevojshëm mjekësor.
Sipas Borovcit, sot rreth orës 16:00, policia ka pranuar informata për rastin dhe menjëherë njësitet e nevojshme kanë dalë në vendngjarje.
“Me të marrë informatën, policia ka dalë në vendin e ngjarjes dhe nga informacionet e para dyshohet se dy persona kanë marrë plagë nga arma e zjarrit” – ka thënë ai.
Tutje, zëdhënësi tregoi se ngjarja ka ndodhur në rrugën “Nuhi Gashi” në Podujevë dhe se policia ka vazhduar me veprime të ekzaminimit të vendngjarjes.
