Diana Bajrami dhe Besim Iazi, Foto: Komuna e Kacanikut, Facebook
Ish drejtoresha e Shëndetësisë zgjidhet drejtoreshë e shkollës në Kaçanik
Ish drejtoresha e Shëndetësisë, Diana Bajrami-Reka në Komunën e Kaçanikut është zgjedhur në pozitën e drejtoreshës së shkollës fillore dhe të mesme të ulët “Emin Duraku”.
Punësimin e ish drejtoreshës së Shëndetësisë për KALLXO.com e ka konfirmuar Zyra për Informim në Komunën e Kaçanikut.
“Pozita e saj si drejtoreshë nuk ka ndikuar asgjë, procedurat janë zhvilluar sipas ligjeve në fuqi, dhe për tërë procesin e zhvilluar deri më tani, nuk është pranuar asnjë ankesë”, thuhet në përgjigjen e Komunës.
Zyra për Informim ka bërë të ditur se Bajrami-Reka do të mbajë vetëm pozitën e drejtoreshës së shkollës.
“Ajo tashmë ka dhënë dorëheqje nga pozita e DSHMS-së dhe sapo të plotësohen afatet e nevojshme kohore sipas ligjit, ajo do të filloj punën si drejtoreshë në Shkollën Fillore “Emin Duraku””, thuhet në përgjigjen e tyre.
Sipas një njoftimi të Komunës së Kaçanikut, Diana Bajrami – Reka ka shërbyer si udhëheqëse e Shëndetësisë dhe Mirëqenies Sociale në Kaçanik që nga muaji mars i vitit 2015.