Djemtë e Ibrahim Rugovës mbështesin kandidatin e LDK-së për deputet

Kandidati i LDK-së për deputet, Faton Bislimi ka vizituar rezidencën e familjes Rugova.

Bislimi ka thënë se është i nderuar me përkrahjen e familjes së presidentit Rugova në zgjedhjet e jashtëzakonshme të 14 shkurtit.

“Ndihem jashtëzakonisht i nderuar me përkrahjen e familjes së Presidentit Rugova për udhëtimin tim politik në shërbim të interesit nacional të Republikës sonë dhe të Lidhjes Demokratike të Kosovës”, ka deklaruar Bislimi pas një takimi me anëtarë të familjes Rugova.

Kandidati për deputet të LDK-së ka thënë se rezidenca e presidentit Rugova është shtëpia ku një ëndërr e madhe e kombit tonë zuri fill për t’u bërë realitet.

“Këtu u vendosën themelet e Republikës sonë në miqësi të përhershme me ShBA-së. Këtu gjetën konakun e bujarisë dhe fisnikërisë sonë shqiptare shumë personalitete amerikane e botërore të cilët u angazhuan pa rezervë për kauzën tonë të drejtë për liri, pavarësi e demokraci”, ka thënë Bislimi.