Boris Bondarev, Foto: BBC

Diplomati rus jep dorëheqje në shenjë proteste ndaj luftës në Ukrainë

Një diplomat rus ka lënë punën e tij në shenjë proteste ndaj luftës “të përgjakshme, të pamend” “të nisur nga Putin kundër Ukrainës”, raporton BBC.

Boris Bondarev, LinkedIn i të cilit thotë se ka punuar në misionin rus në OKB në Gjenevë, i tha BBC-së se e dinte se vendimi i tij për të folur mund të nënkuptojë se Kremlini tani e konsideron atë një tradhtar.

Por ai i qëndroi deklaratës së tij, e cila e përshkroi luftën si “një krim kundër popullit ukrainas” dhe “popullit të Rusisë”.

Moska ende nuk ka komentuar.

Rusia ka goditur ata që janë kritikë ose largohen nga tregimi zyrtar për luftën, të cilit ky shtet i referohet vetëm si “një operacion special ushtarak”.

Në letrën e postuar në mediat sociale dhe të ndarë me kolegët diplomatë, Bondarev shpjegoi se kishte zgjedhur t’i jepte fund karrierës së tij 20-vjeçare në shërbim, sepse nuk mund të “ishte më pjesëmarrës në këtë poshtërim të përgjakshëm, të pamend dhe absolutisht të panevojshëm”.

“Ata që e konceptuan këtë luftë duan vetëm një gjë – të qëndrojnë në pushtet përgjithmonë”, ka shkruar ai.

“Për ta arritur këtë, ata janë të gatshëm të sakrifikojnë aq jetë sa duhet”, vazhdoi ai. “Mijëra rusë dhe ukrainas kanë vdekur tashmë vetëm për këtë” raportohet të ketë thënë diplomati rus.

Përmes kësaj letre ai nuk ka kursyer as ish-punëdhënësin e tij, duke akuzuar Ministrinë e Jashtme të Rusisë se është më e interesuar për “gënjeshtra dhe urrejtje” sesa për diplomaci.

Një gjë e tillë ishte rrëqethëse teksa letrat e dorëheqjes vazhdojnë.

Diplomati Boris Bondarev nuk u përmbajt në kritikat e tij ndaj Presidentit Putin, Ministrit të Jashtëm Lavrov dhe ofensivës ruse në Ukrainë.

“Lufta agresive…krimi më i rëndë…luftënxitës, gënjeshtra dhe urrejtje…”

Është e rrallë të dëgjosh fjalë të tilla nga një zyrtar rus. Në tre muajt që kur Vladimir Putin filloi atë që ai ende e quan ‘Operacioni i tij Special Ushtarak’ në Ukrainë (ajo që shumica e botës e quan lufta e Rusisë) ka pasur pak shenja të mospajtimit të hapur në institucionet shtetërore ruse.

E turpshme për autoritetet ruse? Absolutisht. Ata duan të thonë se makina shtetërore këtu qëndron plotësisht pas vendimit të presidentit Putin për të pushtuar Ukrainën.

Por një dorëheqje nuk do të thotë automatikisht se do të pasojnë shumë të tjera. Zoti Bondarev më pranoi se ai është në pakicë. Ai beson se, për momentin, shumica e zyrtarëve në Ministrinë e Jashtme ruse mbështesin linjën zyrtare dhe mbështesin ‘operacionin special’ të Kremlinit.

Duke folur për BBC, Bondarev tha se ai “nuk kishte parë asnjë alternativë” përveç dorëheqjes: “Unë nuk mendoj se do të ndryshojë shumë, sinqerisht, por mendoj se mund të jetë një tullë e vogël në murin më të madh që përfundimisht do të të ndërtohet. Shpresoj se po”.

Bondarev raportohet të ketë shpalosur se pushtimi fillimisht ishte pritur nga kolegët me “lumturi, kënaqësi, eufori” për faktin se Rusia “kishte ndërmarrë disa hapa radikalë”.

“Tani ata janë më pak të kënaqur me këtë, sepse ne po përballemi me disa probleme, para së gjithash me ekonominë,” tha ai për BBC. “Por unë nuk shoh që shumë prej tyre do të pendohen dhe do të ndryshojnë pikëpamjet e tyre.

“Ata mund të bëhen pak më pak radikalë, më pak agresivë. Por jo paqësorë”, tha ai.
Në të kundërt, Bondarev tha në letrën e tij të hapur se “kurrë nuk kishte pasur aq turp për vendin tim” sa më 24 shkurt, ditën kur filloi pushtimi.

Sipas BBC, është e paqartë nëse ai është diplomati i parë që jep dorëheqjen nga misioni, ani pse askush tjetër nuk është shprehur publikisht për këtë temë.

“Bondarev nuk ka iluzione se Moska tani do ta shohë atë si një tradhtar, por vëren ai se nuk ka “bërë asgjë të paligjshme”.

“Sapo dhashë dorëheqjen dhe thashë mendimin tim”, tha ai. “Por unë mendoj se duhet të shqetësohem për sigurinë time sigurisht”, raportohet të ketë thënë diplomati Bondarev.