Digjen disa vetura në një parking në lagjen ‘Veternik’ të Prishtinës

Sot rreth orës 14:00 janë djegur disa vetura në një parking të automjeteve në lagjen ‘Veternik’ të Prishtinës.

Policia e Kosovës e ka konfirmuar rastin për KALLXO.com.

“Rreth orës 13:40 në Veternik të Prishtiës, në një parking është raportuar për një rast zjarri. Njësitet policore menjëherë kanë dalë në vendin e ngjarjes, ku kanë vërejtur se nga zajarri i cili dyshohet se ka kapluar një veturë të parkuar, dyshohet se janë djegur/dëmtuar edhe disa vetura tjera të prekura”, thuhet në njoftim.

“Janë njoftuar me kohë njësitet e zjarrfikësve të cilat kanë lokalizuar zjarrin. Për momentin nuk raportohet për të lënduar por vetëm për dimë materiale në 7 apo 8 vetura”, thuhet tutje në njoftim.

Për rastin kanë reaguar edhe nga qendra tregtare “Albi Mall”.

“Për shkak të disa problemeve teknike një veturë në parking të Albi Mall-it ka marrë flakë duke shkaktuar edhe djegjen e disa veturave përreth. Ekipi i Sigurimit të Albi Mall-it ka intervenuar menjëherë në kohë rekord për parandalimin e zjarrit duke thirrur edhe Policinë dhe Zjarrfikësat të cilët kanë dalë në vendin e ngjarjes dhe kanë marrë masa për shuarjen e zjarrit dhe kontrolluar situatën përreth”, thuhet në njoftim.

“Gjendja është stabilizuar dhe për momentin gjithçka është nën kontroll, është e rëndësishme të përmendet se nuk ka dëme në njerëz”, thuhet në fund të reagimit.