Dialogu Kosovë-Serbi, Andin Hoti jep sqarim lidhur me dakordimin për hapjen e arkivave të luftës

Andin Hoti, kryesuesi i Komisionit qeveritar për personat e zhdukur dhe kryetar i delegacionit për bisedime për çështjen e personave të zhdukur, ka sqaruar temat për të cilat u dakorduan palët nga Kosova dhe Serbia gjatë takimeve të fundit në Bruksel.

Hoti ka thënë se takimi i parë është mbajtur në mes të Miroslav Lajçak, zëvendëskryeministrit Besnik Bislimi, dhe prej tij si kryetar i Komisionit qeveritar për persona të zhdukur.

Kurse, takimi i dytë është mbajtur në mes të Lajçakut, zëvendëskryeministrit Besnik Bislimit dhe Petar Petkoviq.

Sipas Hotit, në këto takime janë trajtuar temat për zbardhjen e fatit të të pagjeturve, ku është kërkuar që Serbisë t’i bëhet më shumë presion për këtë çështje.

Lidhur me hapjen e arkivave të luftës nga ana e Serbisë dhe ato të UÇK-së në Kosovë, Hoti potencon se fakti që Serbia ka kryer krime në nivel të organizuar shtetëror, kanë kërkuar qasje të plotë në arkivat shtetërore të Serbisë.

Kurse për arkivat e UÇK-së, Hoti theksoi se kanë ftuar Lajçakun për qasje të plotë në to, por edhe të hiqen dyshimet mbi shpikjet për UÇK-në.

Tutje, Hoti bëri të ditur se kanë kërkuar qasje të plotë në territorin e Serbisë për hulumtime të varrezave masive.

Ai ka thënë se këtë njoftim po e bën për të mos pasur keqinterpretim apo keqkuptim nga ana e mediave.

Lidhur me dakordimin nga pala kosovare për hapje të arkivave të UÇK-së ka reaguar nënkryetarja e Partisë Demokratike të Kosovës, Vlora Çitaku e cila ka kërkuar nga Besnik Bislimi të sqarojë se për çfarë arkiva kanë rënë dakord.

Më poshtë gjeni njoftimin e plotë të Andin Hotit:

“Të dashur familjarë të personave të zhdukur me forcë,
Të nderuar qytetarë,

Pas vizitës dy ditore në Bruksel më lejoni t’iu informoj lidhur me takimet dhe angazhimet e delegacionit të kryesuar nga zv. Kryeministri z. Besnik Bislimi, për zbardhjen e fatit të më të dashurve tanë që na mungojnë.

Takimi i parë është mbajtur në mes të z. Miroslav Lajçak, z. Besnik Bislimi, dhe meje si Kryetar i Komisionit Qeveritar për Persona të Zhdukur.
Takimi i dytë është mbajtur në mes të z. Lajçak, z. Besnik Bislimi dhe z. Petkoviç.
Në të dyja takimet janë trajtuar këto tema:

– Është njoftuar z. Lajçak lidhur me procesin e deritashëm, progresin dhe sfidat që po hasim në zbardhjen e fatit të më të dashurve tanë;

– Kemi kërkuar që fati i këtyre personave të trajtohet si çështje imediate dhe humane;

– Kemi kërkuar intensifikim të bashkëpunimit në shkëmbimin e informatave, dinamikë të shtuar të takimeve tona, qoftë nevoja edhe për çdo muaj, jo vetëm 2 herë në vit siç ka qenë deri tani;

– Kemi kërkuar gjithashtu garanci, rritje të presionit ndaj Serbisë dhe afat kohor për procesin, sepse zbardhja e fatit të të pagjeturve nuk mund të lejojmë të zvarritet pafundësisht;

– Pasi që Serbia ka qenë e organizuar në nivel shtetëror me organet dhe forcat policore e ushtarake, si dhe me njësi paramilitare që kanë vrarë e masakruar anë e kënd Kosovës, duke i kidnapuar e zhdukur me forcë mijëra persona, ne kemi kërkuar qasje të plotë në arkivat shtetërore të Serbisë, veçanërisht në arkivat e ushtrisë dhe policisë gjatë kohës së luftës në Kosovë;

– Lidhur me arkivat, pas dakordimit të palës serbe, kemi ofruar bashkëpunim të plotë dhe e kemi ftuar z. Lajçak për qasje të plotë në arkivat shtetërore të Kosovës, me qëllim që të heqim çfarëdo dyshimi që mund të kenë sa i përket ‘shpikjes së tyre për arkivat e UÇK-së’. Arkivat e Kosovës kanë qenë dhe janë të hapura, prandaj marrëveshja është në interesin tonë sepse vetëm na mundëson çasje në arkivat ushtarake të Serbisë, e që është barriera kryesore për zbardhjen e fatit të më të dashurve tanë.

– Po ashtu, kemi kërkuar qasje të plotë në territorin e Serbisë për hulumtime të varrezave masive apo çfardo informate që kemi për zbardhjen e fatit të personave të zhdukur;

– Kemi kërkuar dorëzimin e menjëhershëm të raporteve të ADN-së, pas identifikimit të trupave nga varreza masive e Kizhevakut, në mënyrë që të njoftohen familjarët, si dhe të bëhet urgjentisht riatdhesimi i trupave në Kosovë.

Këtë njoftim po e bëjë për t’i informuar familjarët e personave të zhdukur me forcë lidhur me diskutimet dhe kërkesat tona në Bruksel, si dhe për të evituar çdo keqinterpretim apo keqkuptim që mund të shfaqet në komunikimet përmes mediave.

Politizimi i kësaj çështje, e sidomos i takimeve tona në Bruksel, nuk i bënë nder askujt dhe nuk e ndihmon procesin dhe ndjeshmërinë që ka kjo temë.

Shpresoj në mirëkuptimin dhe bashkëpunimin e spektrit politik kur janë në pyetje edhe 1632 persona që na mungojnë.”