Foto: Facebook/ Nisma Socialdemokrate
Dështimi katastrofal i ministrave të NISMA-AKR që synonin postin e deputetit
Koalicioni parazgjedhor NISMA-AKR-PD nuk e ka kaluar pragun për t`u bërë pjesë e Kuvendit të Kosovës, nga zgjedhjet e jashtëzakonshme të 6 tetorit, e që rrjedhimisht rezultatet janë zhgënjyese edhe për kandidatë për deputetë.
Nisma dhe AKR-ja të cilat ishin pjesë e qeverisë në largim të Ramush Haradinajt, kanë udhëhequr me disa ministri të vendit.
Ministrat në largim i ishin futur garës për deputetë, por që nuk arritën të marrin besimin qytetar për të siguruar ulëse në Kuvend.
Ministri në detyrës i Tregtisë dhe Industrisë nga Nisma Socialdemokrate, Endrit Shala, në zgjedhjet e 6 tetorit i ka marr vetëm 6,819 vota.
Ministri në detyrë i Zhvillimit Ekonomik, nga radhët e AKR-së, Valdribn Lluka ka marr 2,851 në zgjedhjet e sivjetme.
Edhe ministri tjetër në largim i Nismës, Skender Reçica i cili e ka udhëhequr Ministrinë e Punës dhe Mirëqenies Sociale, ka grumbulluar 3,597 vota.
Kurse, ministri në detyrë i Mjedisit dhe Planifikimit Hapësinor, Fatmir Matoshi (AKR) më 6 tetor ka arritur t’i marr 4,280 vota.
Ekrem Mustafa, ministër në detyrë i Punëve të Brendshme nga AKR-ja i ka marr vetëm 774 vota.
Komisioni Qendror i Zgjedhjeve (KQZ), sot ka shpallur rezultatet përfundimtare të zgjedhjeve nacionale të këtij viti.
Nga kjo garë elektorale, Lëvizja Vetëvendosje ka dal partia e parë, me 220,811 vota ose 26.159% apo 32 deputetë; LDK më 6 tetori grumbulloi 205,458 vota apo 24.458% me 29 deputetë. Partia e tretë ka dalë PDK me 178,645 vota apo 21.163% apo 25 deputetë. Koalicioni AAK-PSD ka marr 96,883 vota apo 11,477% apo 14 deputetë.
Kurse, Lista Serbe ka marr 10 deputetë apo 57,015 vota apo 6.754%.