Dëshmitarja në rastin Ivanoviq shmang përmendjen e kriminelëve “kërcënues” serbë

Ksenja Bozhoviq, e cila ishte nënkryetare e partisë Liri, Demokraci, Drejtësi të Oliver Ivanoviqit, nuk pranoi të martën t’i tregonte Gjykatës Themelore të Prishtinës emrat e grupeve të organizuara kriminale për të cilat politikani i vrarë e paralajmëroi atë para vrasjes së tij në Mitrovicë në Kosovë në janar 2018.

“Nëse dikush ju thotë duhet të keni frikë nga grupet e organizuara kriminale, ai duhet t’ju ketë treguar edhe se kush ishin ata. Nuk mund të jeni ruajtur nga çdo qytetar në veri (të Mitrovicës)”, i tha kryetari i trupit gjykues, Valon Kurtaj, Bozhoviqit.

Megjithatë, Bozhoviqi i tha gjykatës: “Ivanoviqi nuk më ka thënë kurrë specifikisht prej kujt ishte rrezikuar.”

Ajo këmbënguli se asaj “nuk i është bërë presion” dhe se nuk e njeh shumicën e njerëzve në Mitrovicën e Veriut me shumicë serbe, pavarësisht se ka lindur atje dhe ka jetuar atje për 30 vitet e fundit.

Faruk Korenica, avokati i njërit prej të pandehurve, Nedeljko Spasojeviq, tha për mediat pas seancës se beson se Bozhoviq kishte frikë.

“Dëshmitarja, për mendimin tim, është shumë e frikësuar dhe nuk po thotë të vërtetën”, tha Korenica.

“Për gjërat periferike, ajo ka qenë në gjendje në çdo sekondë të tregojë çfarë ka ndodhur dhe për gjërat kryesore të kësaj çështje penale thotë se i ka harruar, nuk i mban mend, gjë që nuk është e pranueshme”, shtoi ai.

Ai i bëri thirrje prokurorit special të rastit që “të lexojë deklaratat që ajo kishte dhënë paraprakisht dhe të tregojë pse tani ajo po i ndryshon fjalët e saj”.

Bozhoviq dëshmoi të hënën se Ivanoviqi kishte thënë publikisht se po kërcënohej, veçanërisht gjatë zgjedhjeve komunale të vitit 2017 në Kosovë, kur ai ishte kandidat për kryetar të komunës së Mitrovicës së Veriut të dominuar nga serbët.

Bozhoviqi u pyet të martën në lidhje me reklamat e partisë politike serbe të Kosovës të mbështetur nga Beogradi, Lista Serbe, e cila tregonte Ivanoviqin me një shënjestër mbi të, dhe që bëri që ai të hiqte dorë nga kandidatura e tij për kryetar të Mitrovicës së Veriut në zgjedhjet e vitit 2017.

“Reklama ishte në televizion dhe ishte paguar nga Lista Serbe”, konfirmoi ajo.

Katër nga të pandehurit – Marko Rosiq, Silvana Arsoviq, Rade Basara dhe Nedeljko Spasojeviq – akuzohen si anëtarë të një ndërmarrjeje të përbashkët kriminale që vrau Ivanoviqin jashtë zyrës së partisë së tij politike në qytetin e Mitrovicës në janar 2018.

Dy oficerë policie, Dragisha Markoviq dhe Zharko Jovanoviq, janë gjithashtu në gjyq, të akuzuar për manipulim të provave në këtë rast. Të gjithë ata janë vetëdeklaruar të pafajshëm.

Biznesmenët serbë të Kosovës Milan Radojiçiq dhe Zvonko Veselinoviq janë akuzuar si udhëheqës të grupit të organizuar kriminal që vrau Ivanoviqin.

Radoiçiq, i cili është gjithashtu nënkryetar i partisë kryesore politike serbe të Kosovës të mbështetur nga Beogradi, Lista Serbe, shihet gjerësisht si mbajtësi i vërtetë i pushtetit në Kosovën veriore me shumicë serbe. Ai ka mohuar përfshirjen në vrasjen e Ivanoviqit.

Dikur shihej si një nacionalist ekstrem, Ivanoviq ishte shndërruar në një politikan të moderuar që mbronte bashkëjetesën mes pakicës serbe të Kosovës dhe shumicës shqiptare.

Ai gjithashtu ishte bërë gjithnjë e më i zëshëm në kritikat e tij ndaj qeverisë së Beogradit.

Në kohën e vdekjes së tij, ai po rigjykohej për urdhërimin e vrasjes së shqiptarëve të Kosovës gjatë luftës në Kosovë në vitin 1999. Ai ishte vetëdeklaruar i pafajshëm.