Deputetja britanike kritikon bashkësinë ndërkombëtare për qëndrimet lidhur me zhvillimet në Veri
Kryetarja e Komisionit për Politikë të Jashtme në Parlamentin Britanik, Alicia Kearns ka reaguar duke komentuar zhvillimet e sotme në veri të Kosovës.
Kearns ka kritikuar ndërkombëtarët në lidhje me deklaratat e tyre kundër veprimeve të qeverisë së Kosovës në veri, duke theksuar se kryetarët janë zgjedhur në mënyrë demokratike.
“Ndërkombëtarët duhet të ndalojnë para se të sulmojnë zyrtarët e zgjedhur në mënyrë demokratike që marrin zyrat e tyre në veri të Kosovës. Për më tepër kur ata qëndrojnë të heshtur përballë militantëve e mbështetur dhe të armatosur serbë, të cilët vazhdojnë të minojnë stabilitetin në veri të Kosovës” – ka shkruar Kearns në Twitter.
International actors should pause before attacking democratically elected officials taking up their offices in Northern Kosovo.
Not least when they stay silent on and fail to call out Serbian backed and armed milita who continue to undermine stability in the north of Kosovo.
— Alicia Kearns MP (@aliciakearns) May 26, 2023
Bashkimi Evropian ka reaguar pas zhvillimeve në veri duke thënë se dënon ashpër përleshjet me policinë e Kosovës dhe protestuesit në veri të Kosovës, “të iniciuara nga tentativa e kryetarëve të sapozgjedhur të komunave për të hyrë në ndërtesat komunale”.
BE ka thënë se nuk do të pranojë asnjë veprim të “mëtejshëm të njëanshëm ose provokues dhe ruajtja e paqes, dhe siguria në terren duhet të jetë prioritet”.
Ndërsa sekretari amerikan i Shtetit, Antony Blinken reaguar në lidhje me zhvillimet në veri duke dënuar veprimet e Qeverisë së Kosovës që sipas tij, “po përshkallëzojnë tensionet në veri dhe po shtojnë jostabilitetin”.
Blinken i ka bërë thirrje kryeministrit Albin Kurti të ndalojë këto masa dhe të përqendrohet në dialogun e ndërmjetësuar nga Bashkimi Evropian.
Që nga mesdita, në katër komunat e veriut të vendit është dëgjuar alarmi, ndërsa pranë disa objekteve komunale, si në Zveçan e në Zubin Potok, janë parë qytetarë të cilët kanë kundërshtuar futjen e kryetarëve të zgjedhur në objektet komunale.
Pesë policë të Kosovës kanë pësuar lëndime të lehta trupore, pasi janë sulmuar nga protestuesit në Zveçan me mjete të forta dhe shok-bomba, ka konfirmuar Policia e Kosovës.
