Deputeti i PDK-së ftohet nga Gjykata Speciale
Ferat Shala, deputet i Kuvendit të Kosovës, nga radhët e PDK-së, ka marrë ftesë nga Gjykata Speciale në Hagë.
Këtë e ka bërë të ditur vetë Ferat Shala, në Facebook, duke treguar se është ftuar që të jetë në Hagë me 5 shkurt të vitit 2020.
“Të nderuar qytetarë të Republikës së Kosovës. Dua të ju informoj që kam pranuar ftesë nga Gjykata Speciale në Hagë, të cilës do i përgjigjem më datë 05.02.2020”. ka njoftuar Ferat Shala.
Shala ka thënë se asnjëherë nuk është ndjerë me i nderuar se sa kur ka qenë pjesë e UÇK-së.
Ai po ashtu nuk ka treguar se në cilësinë e kujt është ftuar, të dëshmitarit apo të të dyshuarit.
Ferat Shala ka qenë edhe ministër i Mjedisit dhe Planifikimit Hapësinor.
Më poshtë mund të lexoni njoftimin e plotë të Ferat Shalas:
Të nderuar qytetarë të Republikës së Kosovës,
Dua të ju informoj që kam pranuar ftesë nga Gjykata Speciale në Hagë, të cilës do i përgjigjem më datë 05.02.2020.
Në tërë veprimtarinë time jetësore atdhetare asnjëherë nuk jam ndi më i nderuar dhe respektuar se sa kur isha pjesë e UÇK-së! Asnjë shkronjë nuk e heq nga e kaluara ime në të gjitha periudhat e veprimtarisë sime!
Me këtë rast, dua të falenderoj trungun tim familjarë që më edukoi në rrugën e drejtë karshi popullit dhe atdheut tim. Shpreh falenderim dhe mirënjohje për të gjithë bashkëluftëtarët, dëshmorët dhe heronjtë për sakrificën sublime që ata bënë.
Lavdi Ushtrisë Çlirimtare të Kosovës!