Dënohet ETC pas ankesës së KALLXO.com
Inspektorati i Tregut ka shqiptuar gjobë ndaj ETC-së në Prizren pas raportimit të një qytetari në KALLXO.com se ky market është duke mashtruar konsumatorët me çmimet e gotave të plastikës.
Në bazë të këtij raportimi, një qytetar është ankuar në lidhje me një produkt i cili, në periudhën e blerjes nga konsumatori ka qenë në zbritje (aksion) prej 0.59 cent në 0.49 cent por që në arkë i është faturuar konsumatorit me vlerë 0.59 cent.
Pas raportimit, KALLXO.com ka njoftuar Inspektoratin e Tregut pranë Ministrisë së Tregtisë dhe Industrisë në lidhje me këtë praktikë të maketit ETC në Prizren.
Në një njoftim të cilin inspektorati e ka adresuar në KALLXO.com shkruhet se Inspektoriat i Tregut ka inspektuar këtë market dhe ka konstatuar shkelje të Ligjit për Mbrojtjen e Konsumatorit dhe ka shqiptuar gjobë.
“Në subjektin e lartcekur afarist [ETC] produkti “Gota plastike 180 ml.” çmimi në raft ishte 0.49€ ndërsa te arka fiskale 0.59€ me çka u vërtetua se raportimi i qytetarit ishte i bazuar, prandaj Inspektorët e Inspektoratit të Tregut ndaj subjektit në fjalë kanë shqiptuar gjobë administrative pasi që konsiderojmë se një veprim i tillë është në kundërshtim me ligjin Nr.04/L-121 Për Mbrojtjen e Konsumatorit”, thuhet në njoftimin e Inspektoratit të Tregut “thuhet në përgjigjen e inspektoratit të tregut.
Kallxo.com ka nisur një fushatë të raportimit të rasteve të mashtrimit të konsumatorëve. Raportet e qytetarëve do trajtohen nga ekipi i hulumtuesve të Kallxo.com, ndërsa bizneset dhe ata që shkelin rregullat do raportohen tek organet kompetente nga ekipi i zyrës ligjore të KALLXO.com.
Detajet se si mund të raportoni mund t’i ndiqni në video materialin e mëposhtëm.
“Ky grant financohet nga Agjensioni Suedez për Zhvillim dhe Bashkëpunim Ndërkombëtar (Sida), menaxhuar nga Fondacioni Kosovar për Shoqëri Civile (KCSF). Përmbajtja dhe rekomandimet e paraqitura nuk përfaqësojnë qëndrimin zyrtar të Agjensioni Suedez për Zhvillim dhe Bashkëpunim Ndërkombëtar (Sida) dhe Fondacionit Kosovar për Shoqëri Civile (KCSF).”
