Moskë - Foto: REL/TASS
Coronavirusi, Rusia mbyll nesër të gjithë kufijtë
Rusia do të mbyllë nga nesër kufijtë e saj në përpjekje për të penguar përhapjen e coronavirusit, thotë një dekret qeveritar, raporton Reuters.
Kjo masë, e bërë publike të shtunën – ditën me numrin më të madh të të infektuarve me COVID-19 (228 brenda 24 orëve, nga gjithsej 1.264 raste), përfshin të gjitha automjetet, trenat dhe këmbësorët dhe do të zbatohet edhe në kufijtë detarë të vendit.
Diplomatët rusë dhe kamionët e transportit të mallrave mund të vazhdojnë të qarkullojnë.
Rusia tashmë ka pezulluar të gjitha lidhjet ajrore ndërkombëtare dhe ka njoftuar se në javën e ardhshme, nga 30 marsi deri më 5 prill, të gjithë punëtorët do ta kenë pushim, me përjashtim të atyre që punojnë në barnatore apo supermarkete.
Kryetari i Moskës Sergey Sobyanin ka publikuar një mesazh në internet, duke ftuar të gjithë banorët që të mbyllen në shtëpitë e tyre gjatë javës së ardhshme dhe të mos dalin përveç nevoje tepër të domosdoshme.