Foto: ZKM
Chollet përshëndet Kurtin për marrëveshjen e Ohrit: Kosova tani më afër se kurrë të ardhmes së saj në BE
Këshilltari i lartë i Departamentit amerikan të Shtetit, Derek Chollet, përmes dy reagimeve të ndara, një për Kosovën e një për Serbinë, në Twitter ka folur për takimin e 18 marsit që u mbajt në Ohër të Maqedonisë së Veriut.
Chollet ka thënë se ka uruar kryeministrin e Kosovës, Albin Kurti sot për marrëveshjen e arritur për normalizim të marrëdhënieve me shtetin fqinj, Serbinë.
Ai në reagimin e tij ka shtuar edhe se Kosova tani është më afër se kurrë me të ardhmen e saj në Bashkimin Evropian.
Congratulated Prime Minister @albinkurti today on the agreement reached in Ohrid, North Macedonia, on normalization of relations with Serbia through the EU-Facilitated Dialogue. Kosovo now closer than ever to its EU future.
— Derek Chollet (@CounselorDOS) March 23, 2023
Në anën tjetër, Chollet ka falënderuar presidentin serb, Aleksandar Vuçiq për ‘angazhimin konstruktiv në Ohër’.
“Është e rëndësishme të merren hapa të menjëhershëm për të zbatuar dhe vendosur një rrugë të qëndrueshme drejt normalizimit dhe integrimit në BE” – është shprehur ai.
Thanked Pres Vucic @predsednikrs for constructive engagement in Ohrid. Important to take immediate steps to implement and set firm path toward normalization and EU integration. Also thanked Serbia for reengaging with U.S. on defense exercises. #PlatinumWolf!
— Derek Chollet (@CounselorDOS) March 23, 2023
Më 18 mars, Kosova dhe Serbia në Ohër të Maqedonisë së Veriut u dakorduan për aneksin e zbatimit të Marrëveshjes drejt normalizimit.
Palët nuk e nënshkruan marrëveshjen, por BE-ja dhe Shtetet e Bashkuara janë deklaruar se pavarësisht se nuk është firmosur, ajo është marrëveshje e obligueshme për palët.
Marrëveshja, prej 11 nenesh, nuk përmend në mënyrë specifike njohjen e ndërsjellë. Megjithatë, dokumenti kërkon nga të dyja vendet që t’i pranojnë dokumentet dhe simbolet e njëra-tjetrës, përfshirë: pasaportat, diplomat dhe targat.
Dokumenti kërkon, gjithashtu nga palët që t’i zbatojnë të gjitha marrëveshjet e arritura deri më tash në dialogun për normalizimin e marrëdhënieve, përfshirë edhe atë për formimin e Asociacionit të komunave me shumicë serbe në Kosovë, të cilin Qeveria e Kosovës e ka refuzuar deri më tash, me arsyetimin se mund të rrezikojë funksionalitetin e shtetit.
