Buxheti lëkund koalicionin qeveritar të Scholzit

Një figurë e lartë në partinë më të vogël të koalicionit të Gjermanisë nuk e ka përjashtuar mundësinë e rënies së Qeverisë, duke sfiduar partitë më të mëdha partnere që të bëjnë ndryshime në politikën buxhetore në fillim të javës që pritet të përcaktojë fatin e ardhshëm të kabinetit të lëkundur të kancelarit Olaf Scholz, ka raportuar më 04.11.2024 agjencia e lajmeve, Reuters.

Bijan Djir-Sarai, sekretar i përgjithshëm i Demokratëve të Lirë (FDP), të ministrit të Financave, Christian Lindner, u tha gazetarëve pas takimit të udhëheqjes së partisë se kanë dështuar politikat ndërhyrëse të ministrit të Ekonomisë së të Gjelbërve, Robert Habeck.

I pyetur nëse mund të bjerë koalicioni nëse në takimin e koalicionit të mërkurën nuk merren parasysh kërkesat për FDP-së për shpenzime dhe taksa më të ulëta, Djir-Sarai ka thënë: “Do të shohim”.

Tri partitë e koalicionit nuk pajtohen për mënyrën e reagimit ndaj sfidave me të cilat po përballet ekonomia më e madhe e Europës, industritë e makinave të së cilës po përballen me tensione të sindikatave të punëtorëve dhe me kërcënimin në rritje të konkurrencës nga rivalët kinezë.

Socialdemokratët e Scholzit dhe të Gjelbrit, të përballur edhe me mospajtime ndërmjet vete për një numër çështjes, pajtohen se shpenzimet e caktuara qeveritare janë të nevojshme për të nxitur ekonominë gjermane dhe për të refuzuar fokusin e FDP-së të bazuar në dobi të ofertës.

Partia liberale e Lindnerit ka befasuar të premten partnerët me një dokument buxheti që propozon shkurtime shpenzimesh dhe taksash, si dhe derregullim si kundërpërgjigje ndaj gjendjes së rënduar të ekonomisë së Gjermanisë.

FDP-ja kërkon shkurtime që do të godisnin ambiciet e gjelbra, duke i dhënë fund fondit për mbrojtjen klimatike dhe zbutjen e rregullave të mbrojtjes mjedisore.

Vlerësimet e Djir-Sarait janë në kundërshtim të madh me ato të Matthias Mierschit, sekretarit të përgjithshëm të SPD-së, i cili ka deklaruar për televizionin publik se të gjitha partitë duhet të marrin përgjegjësitë e veta dhe të gjejnë një shtegdalje të krizës.

“Jam optimist se të gjitha partitë duan të krijojnë stabilitet për këtë vend në kohë të ndryshme”, ka deklaruar ai. “Mbështetja për ekonominë, nxitja e investimeve dhe shkurtimi i burokracisë: Ndajmë qëllime të njëjta”.

Gjermanisë do t’i duhej sidomos një qeveri stabile nëse Donald Trumpi fiton zgjedhjet presidenciale të 5 nëntorit në Shtetet e Bashkuara, ka shtuar ai, pa dhënë më shumë hollësi se pse.

Scholzi, i cili është takuar me lidershipin partiak dhe ka darkuar të dielën mbrëma me Lindnerin, pritet të ketë bisedime edhe me liderin de fakto Habeck të hënën për të trasuar rrugën për një samit të lidershipit të krerëve të tre anëtarëve të koalicionit.

Zëdhënësi i Scholzit pret që Qeveria ta çojë mandatin deri në zgjedhjet e planifikuara të shtatorit të ardhshëm.

Habeck ka propozuar një program investimi që do të ripërdorte 10 miliardë euro, të dala nga vendimi i gjigantit amerikan të gjysmëpërçuesve Intel për t’u tërhequr nga një projekt i fabrikës së çipave të mbështetur nga Qeveria. Lindner do ta shkurtonte atë ndarje buxhetore tërësisht.

Të tre palët kanë zhvilluar dialog ndaras me bizneset ditët e fundit.

“Qeveria gjermane sapo ka hyrë në një fazë të re të një krize politike të ngadaltë që mund të jetë hapi i fundit përpara rënies eventuale të koalicionit qeverisës”, ka shkruar Carsten Brzeski i ING-së.

Rënia e koalicionit mund ta linte Scholzin në krye të një qeveri pakice, duke u mbështetur në shumicën parlamentare ad-hoc për të qeverisur, ose të shkohej zgjedhje të parakohshme, për të cilat sondazhet sugjerojnë se do të ishin katastrofike për tri partitë e koalicionit.

SPD-ja dhe të Gjelbërit janë shumë larg nga përkrahja e tyre në zgjedhjet e përgjithshme të 2021-s, ndërsa FDP-ja mund të mbetet jashtë parlamentit krejtësisht.

Konservatorët, me 36 për qind, kanë më shumë se dyfishin e mbështetjes para rivalit të tyre më të afërt të së djathtës ekstreme, Alternativa për Gjermaninë, me 16 për qind.

Përgatiti: Rexhep Maloku – Kallxo.com