Çezme - Foto: KALLXO.com
Bregu i Diellit pa ujë edhe pas sanimit të defektit në gypin e ujit që vjen nga Liqeni i Badovcit
Kompania rajonale e Ujësjellësit ‘Prishtina’, sot gjatë ditës kishte njoftuar se kishte rregulluar defektin në gypin që sjell ujin nga Badovci në rezervuarin e Mirditës.
Ujësjellësi përmes një postimi kishte thënë se pas rregullimit të këtij defekti zonave të prekura nga ndërpreja e ujit do t’i rikthehet furnizimi me ujë të pijshëm.
Por, një banor i lagjes “Bregu i Diellit” tha për KALLXO.com se kjo lagje ende nuk është duke u furnizuar me ujë të pijshëm.
KALLXO.com u mundua të kontaktojë zëdhënësen e Ujësjellësit, Arjeta Mjekun, por nuk arriti të marrë përgjigje.
Sot gjatë ditës Ujësjellësi njoftoi për ndërprerje të ujit nga ora 14:00 në Graçanicë, Hajvali, Matiçan, Veternik, dhe zona qendër e lagjes Bregu i Diellit si shkak i punimeve për sanimin e defektit në gypin e qelikut të Badovcit.