Blinken në vizitë të paparalajmëruar në Afganistan

Sekretari amerikan i Shtetit, Antony Blinken, bëri një udhëtim të paparalajmëruar në Kabul, për t’i njoftuar zyrtarët atje me planet e SHBA-së për tërheqjen e trupave deri më 11 shtator.

Vizita e Blinkenit vjen disa orë pas njoftimit të presidentit amerikan, Joe Biden, se ai do t’i japë fund luftës më të gjatë të SHBA-së, duke i kthyer në shtëpi 2,500 trupat e mbetura amerikane në Afganistan.

Blinken takoi presidentin afgan, Ashraf Ghani, dhe zyrtarë të lartë amerikanë në Kabul.

“Me vizitën time, dua të demonstroj përkushtimin e vazhdueshëm të SHBA-së ndaj Republikës Islamike dhe popullit të Afganistanit”, tha Blinken pas takimit me Ghanin.

“Partneriteti po ndryshon, por vetë partneriteti është i qëndrueshëm”, theksoi ai.

“Ne e respektojmë vendimin dhe do t’i përshtatim përparësitë tona”, tha Ghani.

Një ditë më herët, edhe NATO-ja njoftoi se 7,000 ushtarët e saj joamerikanë në Afganistan do të largohen po ashtu nga ky vend, brenda disa muajsh.

NATO, e udhëhequr nga SHBA-ja, ka ndërhyrë ushtarakisht në Afganistan në vitin 2001, pak javë sulmeve terroriste të 11 shtatorit në SHBA.

Që nga ajo kohë, mbi 2,300 ushtarë amerikanë kanë humbur jetën në luftën në Afganistan./REL

Biden: Tërheqja nga Afganistani fillon në maj, përfundon në shtator (evropaelire.org)