Bislimi reagon pas deklaratës së kryeministrit serb se Serbia nuk e ka pranuar planin franko-gjerman

Kryeministri i Serbisë, Millosh Vuçeviq, në seancën e Parlamentit të Serbisë, ka thënë se Republika e Serbisë nuk e ka pranuar planin franko-gjerman për normalizimin e marrëdhënieve mes Kosovës dhe Serbisë.

Kryeministri serb tutje ka thënë se është e papranueshme për Serbinë pranimi i pavarësisë së Kosovës.

“Edhe një herë, ne nuk e kemi pranuar planin franko-gjerman. Ne s’e kemi nënshkruar këtë edhe kemi vendosur deklaratë të qartë dhe e kemi thënë qartë: çdo implikim, implicit ose eksplicit i njohjes së të ashtuquajturës pavarësi e Kosovës është e papranueshme. Është vijë e kuqe për Serbinë. A mund të flasim? Do të flasim. Ne po përdorim çdo hapësirë manovrimi për ta përdorur në mënyrë që shtetin të mos na e varrosin për të disatën herë në historinë e kohërave të fundit, të mos na ndjekin, të mos na dënojnë, të mos na sanksionojnë”- ka thënë Vuçeviq.

Ndaj fjalimit të kryeministrit serb ka reaguar zëvendëskryeministri i Kosovës, Besnik Bislimi, i cili përmes një postimi në rrjetin social “X”, ka shtruar disa pyetje për Përfaqësuesin Special të Bashkimit Europian për dialogun, Mirosllav Lajçak dhe përfaqësuesin e lartë të BE-së për Politikë të Jashtme, Josep Borrell.

“Çfarë nevojitet më shumë për t’iu bindur se për Serbinë nuk ka Marrëveshje Bazike? Që pjesëmarrja e tyre në dialog është fallco vetëm për të evituar sanksione eventuale? Edhe sa drafte të planit të sekuencimit na nevojiten derisa t’iu shfaqet e vërteta shteteve anëtare?”- ka pyetur ai.

Serbia’s PM asking EUSR & EEAS: What else is needed to convince you that for Serbia there is no Basic Agrmt? That their participation in the dialogue is faked just to avoid eventual sanctions? How many more drafts of sequencing plans we need before revealing the truth to all MS? pic.twitter.com/neC56DI3rV

— Besnik Bislimi (@BislimiBesnik) July 24, 2024