Bie vlera e Bitcoin-it në nivelet më të ulëta që nga dhjetori i vitit 2020

Çmimi i një bitcoin-i ka rënë nën 20 mijë dollarë, mes trazirave të thelluara në tregun e kriptomonedhave.

Kriptomonedha të shtunën në mëngjes, në një moment ra në nivele të papara që nga dhjetori 2020, duke shkuar nën 19 mijë dollarë përpara se të rikuperohej në rreth 19 mijë e 160 dollarë, sipas CoinDesk.

Bitcoin dhe kriptovalutat e tjera janë goditur nga disa faktorë duke përfshirë rritjen e inflacionit, i cili ka nxitur rritjen e normave të interesit nga bankat qendrore, raporton The Guardian.

Kjo, nga ana tjetër, ka ulur oreksin e investitorëve për asete më të rrezikshme si kriptovalutat dhe ka goditur tregjet globale të aksioneve, me sektorin e teknologjisë në veçanti.

Javën e kaluar bankat qendrore të Mbretërisë së Bashkuar dhe të SHBA-së ngritën normat në një përpjekje për të frenuar rritjen e çmimeve, duke vënë presion të mëtejshëm mbi kriptomonedhat.

Mbështetësit e Kripto-s kanë thënë se sektori përfaqëson një investim të mirë sepse, për shembull, ai bart tarifa të ulëta dhe, ndryshe nga monedhat konvencionale, nuk është i lidhur me qeveritë.

Megjithatë, kundërshtarët thonë se mungesa e mbikëqyrjes rregullatore ose mbështetja e nënkuptuar e qeverisë, për shkak të origjinës së pavarur të kriptos dhe bitcoin-it, e bëjnë atë të ndjeshëm ndaj mashtrimeve dhe luhatjeve të egra të çmimeve.

Tregu i kriptove, i cili tregton në baza 24-orëshe, po vuan gjithashtu probleme të brendshme që filluan me rënien e Terra, e quajtur “monedhë e qëndrueshme”, vlera e të cilit supozohej të lidhej me dollarin.

Dështimi i tij në maj tronditi besimin në kriptomonedha, duke shkaktuar një valë shitjesh që është përkeqësuar nga lëvizjet më të gjera të normave të interesit.

I gjithë tregu i kriptove, me vlerë më shumë se 3 trilionë dollarë në nëntor të vitit të kaluar, tani vlerësohet në 884 miliardë dollarë sipas firmës së të dhënave CoinGecko.