Biden i premton Trumpit transicion “të butë” pushteti

Presidenti amerikan, Joe Biden, pasi e ka përgëzuar presidentin e zgjedhur të Shteteve të Bashkuara, Donald Trump, në takimin e tyre në Shtëpinë e Bardhë, është zotuar se do të ketë transicion “të butë” të pushtetit të presidencës demokrate te ajo republikane, raporton BBC.

Trumpi dhe Bideni janë takuar për herë të parë pas fitores së republikanit në zgjedhjet e 5 nëntorit kundrejt zëvendëspresidentes demokrate, Kamala Harris. Trumpi dhe Bideni kanë pasur përplasje të ashpra, por presidenti aktual e ka pritur ish-presidentin, megjithëse Trump nuk e kishte pritur pas humbjes së zgjedhjeve më 2020.

“Mirë, zoti president i zgjedhur dhe ish-president, Donald, urime. Presim të kemi një transicion të butë, duke bërë çmos që të sigurohemi se ju do të akomodoheni dhe do të keni çfarë ju duhet. Do të kemi mundësinë të flasim për këtë sot. Andaj, mirë se vini!” – i është drejtuar Biden – Trumpit në fillim të takimit.

“Faleminderit shumë! Politika është e sertë, dhe në shumë raste jo fort botë e këndshme, por sot është një botë e mirë dhe unë e çmoj fort. Një transicion aq i butë, do të jetë sa më i butë që mund të jetë. Përnjëmend e çmoj këtë, Joe” – ia ka kthyer Trump.

Përgatiti: Rexhep Maloku / Kallxo.com