
Besnik Berisha KPM - Luljeta Aliu KPM
Besnik Berisha merr votat për kryetar të KPM-së, Mehmetit i skadon mandati më datë 20 janar
Me katër vota për dhe një votë të pavlefshme, Besnik Berisha është zgjedhur kryetar i ri i Bordit të Komisionit të Pavarur për Media (KPM).
“Kanë votuar pesë anëtarët prezentë në këtë mbledhje. Me katër vota për është zgjedhur Besnik Berisha. Duke u thirrur në ligjin për KPM dhe në bazë të interpretimit të kryeshefit, Besnik Berisha zgjedhet kryetar i KPM-së”- tha Jeton Mehmeti, kryetar aktual i KPM-së.
Ushtruesi i detyrës së kryeshefit ekzekutiv, Niman Racaj tha se sipas rregullores Mehmeti duhet të mbaj pozitën e kryetarit të KPM-së pasi që sipas rregullores së miratuar, kryetari i ri merr detyrën pas përfundimit të mandatit.
“Kryetar rregullorja është që kryetari i ri zgjedhet, nis punën nga dita kur kryetarit i skadon mandatit”- tha Racaj.
Diskutime se kur Berisha nis detyrën e re pati pas përfundimit të votimit.
“Askund nuk e tham që ti shkarkohesh apo mandati yt digjet. Ne nuk të kemi shkarkuar. Ne e kemi rastin më të mirë, rastin e Gjykatës Kushtetuese që zgjedhet kryetari më herët”- tha Besnik Berisha, kryetari i sapo zgjedhur i KPM-së.
“Unë nuk kam siguri që pas zgjedhjes, ligji është më i qartë se rregullorja. Unë nuk mundem me vazhdu në këtë gjendje, unë mund vetëm me ta kalu drejtimin e seancës”- tha Jeton Mehmeti, kryetari aktual i KPM-së.
“Unë jam i vetëdijshëm që mandatin e anëtarit nuk ma keni marrë, jam i vetëdijshëm që me këto vota me këtë votim që u bë, unë nuk kam siguri juridike që të vazhdoj drejtimin e mbledhjes. Nuk po iki, nuk po zhdukem”- tha Mehmeti.
Pas këtyre diskutimeve, kryetari aktual, Jeton Mehmeti kërkoi që të shkojnë në një pauzë.
Në mbledhjen e Komisionit të Pavarur për Media janë propozuar emrat për kryetar dhe nënkryetar të ri të këtij institucioni.
Anëtari i KPM-së, Fitim Veliu propozoi që kryetar i KPM-së të jetë anëtari aktual, Besnik Berisha, ndërsa nënkryetare anëtarja tjetër, Luljeta Aliu.
Propozimi i Berishës dhe Aliut erdhi pas ndryshimit të rregullores për punën e brendshme të KPM-së.
Me tri vota për, një kundër nga kryetari aktual i KPM-së Jeton Mehmeti dhe një abstenim nga anëtari tjetër Fatih Basha, është votuar propozimi për plotësim ndryshimin e rregullores së punës së brendshme të KPM-së, e cila flet për zgjedhjen e kryetarit dhe nënkryetarit të ri të KPM-së.
Në nenin 3 të kësaj rregullore të propozuar nga anëtari i KPM-së Besnik Berisha është shtuar paragrafi “përjashtimisht nga paragrafi 1 i nenit 3, zgjedhja e kryetarit, përkatësisht nënkryetarit mund të bëhet një muaj para skadimit të mandatit të kryetarit, përkatësisht nënkryetarit, veçanërisht për të siguruar që KPM nuk mbetet pa kryetar, përkatësisht nënkryetar në raste kur mund të mbetet pa kuorum për zgjedhjen e tyre”.
Me të hapur mbledhjen e parë për këtë vit (17.01.2025), anëtarët e Komisionit të Pavarur të Mediave kanë shprehur shqetësim lidhur me siç i quajtën ‘lajmet e rreme’ se anëtarët e KPM-së kanë planifikuar që ta shkarkojnë kryetarin e KPM-së, Jeton Mehmeti.
Anëtari i KPM-së Besnik Berisha ka thënë se si pikë e rendit të ditës duhet të trajtohet tema për zgjedhjen e kryetarit të KPM-së me qëllim që mos ta lë komisionin pa kuorum.
“Sot u lansua lajmi që KPM, anëtarët e KPM e kanë plan me shkarku kryetrarin e KPM-së, mua me habiti shumë. Është dezinformatë, askush se ka pas plan me shkarku kryetarin e KPM-së, tri ditë para se me i kalu afati”– ka thënë Berisha.
Berisha tutje ka thënë që meqenëse mandati i kryetarit skadon më 20.01.2025, duhet të ofrohet një zgjidhje me qëllim që mos të pengohet puna e KPM-së pas kësaj date.
“Meqenëse mandati i kryetarit skadon më 20.01.2025, unë mendoj që ne si KPM duhet të ofrojmë një zgjidhje që të sigurojmë që KPM do të ketë kryesi edhe pas kësaj date. Unë propozoj që si pikë e parë të jetë plotësim-ndryshimi i rregullores së punës me qëllim mundësimi i zgjedhjes së kryetarit”- tha ai.
Edhe anëtarët e tjerë Fitim Veliu dhe Luljeta Aliu janë pajtuar me mendimin e Berishës.
Kryetari i KPM-së nuk është pajtuar me propozimin që sot të vendoset për zgjedhjen kryetarit të KPM-së.
“Zgjedhja e një kryetari te ri duhet të bëhet në seancën vijuese kur të përfundon mandati i kryetarit ose të shkarkohet. Dhe argumenti se mund të mbetemi pa kryetar, nuk qëndron sepse anëtari më i vjetër i një organi të ri është përfaqësuesi i KPM-së deri sa të konsitutohet organi”- tha ai.