Foto: Urim Krasniqi/KALLXO.com

Bekim Sele jep dorëheqje nga bordi i RTK-së

4 muaj pasi u votua nga Kuvendi i Kosovës, Bekim Sele ka dhënë dorëheqje nga pozita e anëtarit të bordit të Radiotelevizionit të Kosovës.

Dorëheqja e tij erdhi pak ditë pas anulimit të konkursit për drejtor të RTK-së dhe raportimeve që Sele kishte pikë të njëjta në vlerësim me dy anëtarë të komisionit.

Dorëheqjen për KALLXO.com e ka konfirmuar kryetari i bordit, Besnik Boletini i cili ka përcjellë letrën e dorëheqjes së Seles.

Në këtë letër Sele ka thënë se arsyeja e dorëheqjes ka të bëjë me angazhimet e tij profesionale.

“Përmes këtij e-maili ju informoj për dorëheqjen time nga pozita e anëtarit të Bordit të Radiotelevizionit të Kosovës! Arsyeja e dorëheqjes ka të bëjë kryesisht me punën time profesionale, me theks të veçantë, angazhimin në sferat e filmit dhe në punët e tjera akademike. Shfrytëzoj rastin të ju falënderoj për besimin dhe bashkëpunimin tuaj gatë kësaj periudhe dhe ju dëshiroj më të mirat!”, thuhet në letrën e dorëheqjes së Seles.

Bekim Sele në një përgjigje për KALLXO.com tha se arsyeja e vetme e dorëheqjes janë angazhimet profesionale.

Kallxo.com raportoj që gjatë konkursit të fundit për drejtor të RTK-së Sele dhe dy antarë të tjerë Safet Kabashaj, Bekim Sele dhe Ivan Radulovic kanë vendosur pikë identik në secilën përgjigje të kandidatëve Arben Berisha, Hysen Hundozi  dhe Shkumbin Ahmetxhekaj. Këta tre anëtarë të komisionit vlerësues kanë qenë të ulur pranë njëri-tjetrit gjatë vlerësimit të testeve.

Sele së bashku më anëtarët e tjerë të bordit janë zgjedhur nga Kuvendi i Kosovës në dhjetor të 2021.

Kuvendi zgjodhi bordin e RTK-së