Foto: REL/Shutterstock

BE-ja ndihmon në dorëzimin e vaksinave anti COVID-19 nga Norvegjia në Kosovë

Bashkimi Evropian po e ndihmon Norvegjinë që t’i dërgojë mbi 180,000 doza të vaksinës kundër COVID-19 në Kosovë, pas kërkesës së Kosovës për ndihmë përmes Mekanizmit të Mbrojtjes Civile të BE-së.

Komisioni i bashkërendon dhe financon deri në 75% të shpenzimeve për transportimin e kësaj asistence.

Komisioneri për Menaxhimin e Krizave, Janez Lenarçiç, tha se pandemia mund të mposhtet vetëm nëse të gjithë veprojnë së bashku.

“Pandemia COVID-19 ka ndikuar në të gjithë ne. BE-ja është e përkushtuar që të ndihmojë në ndarjen e vaksinave në mbarë botën – ne mund ta mposhtim pandeminë vetëm nëse veprojmë së bashku. E falenderoj Norvegjinë për ofertën bujare të saj për Kosovën. Qendra jonë e Koordinimit të Reagimit ndaj Emergjencave është e gatshme të ndihmojë për ta lehtësuar ndarjen e mëtejshme të vaksinës”, tha Lenarçiç.

Në komunikatë thuhet se që nga fillimi i pandemisë, Mekanizmi i Mbrojtjes Civile i BE-së e ka bashkërenduar dhe bashkëfinancuar dorëzimin e 140,000 maskave dhe pajisjeve të tjera mbrojtëse personale, si dhe dezinfektuesve, gjeneratorëve të oksigjenit dhe testeve antigjen nga Sllovenia, Çekia dhe Franca në Kosovë.

Në deklaratën e BE thuhet se Mekanizmi i Mbrojtjes Civile i BE-së është njëri nga mjetet që ka qenë i dobishëm për ofrimin e mbështetjes për vendet që kanë kërkuar ndihmë gjatë pandemisë së koronavirusit. Përmes këtij Mekanizmi, BE-ja ndihmon në bashkërendimin dhe financimin e dërgimit të vaksinave, pajisjeve mjekësore dhe mbrojtëse dhe materialeve të tjera në mbarë Evropën dhe botë, në vendet që kërkojnë ndihmë.

Deri më sot, shtetet anëtare të BE-së kanë ndarë mbi 2.5 milionë doza të vaksinave me vendet jo anëtare të BE-së përmes COVAX-it dhe Mekanizmit të Mbrojtjes Civile. Kjo përfshin, për shembull asistencën e kanalizuar përmes Qendrës së Koordinimit të Reagimit ndaj Emergjencave, siç janë mbi 400,000 doza të vaksinave nga Rumania në Moldavi, mbi 50,000 nga Rumania në Serbi, 10,000 nga Kroacia në Butan dhe 55,000 nga Holanda në Suriname.

Norvegjia i dhuron Kosovës 180 mijë doza të vaksinave AstraZeneca