Jarinjë, Foto: KALLXO.com
BE: Ende nuk ka përfunduar takimi mes palëve, negociatat vazhdojnë
Zëdhënësi i Bashkimit Evropian, Peter Stano, ka thënë se takimi mes përfaqësuesve të Kosovës dhe Serbisë, nën ndërmjetësimin e Miroslav Lajçakut, ende nuk ka përfunduar.
Ai ka thënë se ende po bisedohet për të gjetur një zgjidhje për krizën aktuale në veri të Kosovës.
“Takimi i kryengociatorëve të Kosovës dhe Serbisë në Bruksel i lehtësuar nga i deleguari i BE-së për dialogun Miroslav Lajçak, ende nuk ka mbaruar. Negociatat vazhdojnë për të gjetur një zgjidhje për krizën aktuale në veri të Kosovës”, ka shkruar Stano në Twitter.
Dialogue: Meeting of Kosovo & Serbia chief negotiators facilitated by EUSR @MiroslavLajcak in Brussels not over, negotiations continue to find a solution for the current crisis in the north of Kosovo.
— Peter Stano (@ExtSpoxEU) September 29, 2021
Ndërkohë, para mediave është shprehur zëvendëskryeministri i Kosovës, Besnik Bislimi. Ai tha se kanë arritur një marrëveshje në parim me Serbinë për targat.
Sot është dita e 10-të prej kur Qeveria e Kosovës vendosi që të ketë reciprocitet në targa të automjeteve ndaj Serbisë.
Serbët lokalë të veriut të Kosovës kundërshtuan vendimin e ekzekutivit kosovar duke bllokuar rrugët që çojnë në pikat kufitare Jarinjë dhe Bërnjak.
Menjëherë pas vendimit, afër dy pikave kufitare u vendosen forcat speciale të Policisë së Kosovës.
Vetëm pas tetë ditësh bllokadë, KFOR nisi që të patrullojë në veri të vendit.
Ndërkohë, që forcat e rendit të Kosovës qëndronin në pikat e tyre pranë kufirit me Serbinë, ky shtet shtoi prezencën e ushtrisë në afërsi të kufirit me Kosovën.
Madje, disa ditë, pati edhe lëvizje të aeroplanëve ushtarakë e helikopterëve.
Një propozim për zgjidhjen e bllokadës ishte dhënë se fundmi nga komandanti i KFOR-it, por siç u tha nga Qeveria e vendit, ai ishte refuzuar nga pala serbe.
www.kallxo.com