Banorët e Dresnikut të Klinës protestuan sot për mungesën e rrymës

Dhjetëra familje të fshatit Dresnik të Klinës po ankohen se nuk janë të kyçur në rrjetin e energjisë elektrike.

Pas kërkesave të shumta që ata thonë se i kanë drejtuar KEDS-it, për sigurimin e një trafoje në lagjen e tyre, ata sot kanë protestuar para zyrave të kësaj kompanie në Klinë.

Florim Haliti, banor i këtij fshati thotë se KEDS u ka kërkuar “lejet ndërtimore” pronarëve të këtyre shtëpive.

“Arsyeja, jo nuk është në projekt, është lagje e re. Njëherë na i lypshin se a është e legalizune prona, a keni leje të ndërtimit, por leje të ndërtimit gjysma e Klinës nuk ka, por ajo zonë është krejt e banuar” – tha ai.

Ndërkohë thotë se rrymën ai detyrohet ta marrë nga fqinjët.

Kjo nuk është protesta e tyre e parë për këtë çështje.

“Rrymë në përgjithësi nuk kemi. Jemi kanë një herë, e kemi ba njëfarë proteste më herët”.

Derisa disa të tjerë thonë se janë detyruar të jetojnë me qira diku tjetër.

Protestuesit nuk lejonin punëtorët e KEDS-it të hynin në zyrat e tyre. Në këtë rast pati ndërhyrje nga Policia e Kosovës, të cilët e qetësuan situatën.

Pas zyrave të KEDS-it, protestuesit i shkuan në zyrë kryetarit të Komunës së Klinës, Zenun Elezaj. Por nuk e gjetën aty.

Të martën banorët e fshatit Dresnik pritet të takohen me të.

KALLXO.com ka dërguar pyetje në adresë të kompanisë KEDS, por deri në publikimin e këtij artikulli nuk ka pranuar përgjigje.