Avokati Berisha: I dyshuari për spiunazh është dëshmitar i Prokurorisë në Hagë

Njëri nga dy personat që u arrestuan dje, më 05.06.2024, si të dyshuar për spiunazh, është dëshmitar i Prokurorisë në Hagë.

Kështu tha Besnik Berisha, avokat i të dyshuarit Bedri Shabani, pas përfundimit të seancës dëgjimore të mbajtur në Gjykatën e Prishtinës pas kërkesës së Prokurorisë Speciale për caktimin e paraburgimit ndaj dy të dyshuarve.

Avokati nuk ka dhënë më shumë detaje se në në cilin rast klienti i tij është ose ka qenë dëshmitar në Hagë, ku po zhvillohen disa procese ndaj ish-drejtuesve dhe luftëtarëve të UÇK-së.

Avokati rastin e klientit të tij e ka quajtur “spektakël”.

“Nuk pat mundësi Prokuroria për ta zbulu qoftë edhe një transkript të vetëm, qoftë edhe një vëzhgim të vetëm, ose një fotografi të vetme. Prandaj ky spektakël që është bërë është gabim. Është një hetim që ka fillu së paku që 8 muaj, është një rezultat që nuk ka sjellë asgjë përveç se ka sjellë dy emra në emër të së ashtuquajturës drejtësi” – tha Berisha para mediave.

Sipas Berishës, Bedri Shabani ka shkuar në Sarajevë për vizita familjare dhe ka qenë i detyruar të kalojë nëpër Serbi.

Dy të dyshuarve shqiptarë të arrestuar për spiunazh, Bedri Shabani dhe Muharrem Qerimi, u janë gjetur dhe sekuestruar dokumente të ndryshme, kompjuterë, telefona, USB, DVR, kaseta, armë dhe municione, maska, gazmaska ushtarake si dhe shumë dëshmi të tjera.

Një informacion të tillë shtesë në lidhje me arrestimin e dy të arrestuarve në Ferizaj më 05.06.2024 e ka bërë të ditur Policia e Kosovës në raportin 24 orësh.

Policia njoftuar se gjatë kontrollit në lokacionin e të dy të dyshuarve janë sekuestruar këto dokumente dhe pajisje si prova materiale.

I dyshuari Bedri Shabani ishte pjesëtar i Doganës së Kosovës deri në vitin 2004, kur edhe ishte shkarkuar për shkak të komunikimit të paautorizuar me mjetet e informimit masiv, kurse tjetri me inicialet Muharrem Qerimi. sipas burimeve të KALLXO.com ka qenë pjesëtar i Policisë së Kosovës deri në vitin 2011.

Kërkesa është parashtruar nga Prokurori Special, Afrim Shefkiu, ndërsa Gjyqtar i çështjes është Valon Kurtaj.

Dy persona ishin arrestuar dje në Ferizaj nën dyshimin për spiunazh më 05.06.2024. Policia e Kosovës ka kryer bastisje në dy lokacione të ndryshme në Ferizaj.

Udhëheqësja e Zyrës për Komunikim në Zyrën e Kryeprokurorit të Shtetit, Liridona Kozmaqi e kishte konfirmuar dje më 05.06.2024  konfirmuar për KALLXO.com se të arrestuarit janë nën masën e ndalimit 48 orësh me urdhër të Prokurorisë Speciale.

“Mund të konfirmoj se në bashkëpunim me Policinë dhe AKI-në janë realizuar bastisje në dy lokacione, të njëjtit dyshohen për veprën penale të spiunazhit” – kishte thënë Kozmaqi për KALLXO.com.

Çka nënkupton spiunazhi dhe si rregullohet ai në Kodin Penal?

Në Kodin Penal të Republikës së Kosovës, vepra penale e spiunazhit hyn në kuadër të veprave penale kundër rendit kushtetues dhe sigurisë së Republikës së Kosovës.

Ai renditet në nenin 124 të këtij Kodi dhe nënkupton disa situata ku ndër to është; kur sekreti shtetëror i komunikohet, dorëzohet, apo i bëhet i arritshëm shtetit të huaj, organizatës së huaj apo personit që u shërben atyre.

Sipas kësaj, dënueshmëria minimale është 5 vjet burg, kurse maksimale është 12 vjet.

Ky nen në paragrafët e tij parasheh edhe situata të tjera dhe dënueshmëri të ndryshme:

– Kushdo që për shtetin apo organizatën e huaj krijon shërbimin informativ në Republikën e Kosovës apo drejton shërbimin e tillë, dënohet me jo më pak se 10 vjet burgim;

– Kushdo që hyn në shërbimin informativ të huaj, mbledh të dhëna për të apo në ndonjë mënyrë tjetër e ndihmon punën e shërbimit të tillë, dënohet me jo më pak se 5 vjet burgim

Kushdo që mbledh të dhëna apo dokumente të klasifikuara me qëllim që t’ia komunikojë dhe dorëzojë shtetit të huaj, organizatës së huaj apo personit që u shërben atyre, dënohet me burgim prej 3 deri në 10 vjet.

Nëse këto vepra penale kryhen dhe shkaktojnë pasoja të rënda për sigurinë ose fuqinë ekonomike apo ushtarake të shtetit, kryesi dënohet me burgim jo më pak se 10 vjet.

Kurse, nëse këto vepra penale kryhen gjatë kohës së luftës, rrezikut të pashmangshëm për luftë, konfliktit të armatosur apo zbulimi i sekretit shtetëror ka të bëjë me sigurinë e Republikës së Kosovës, kryesi dënohet me jo më pak se 10 vjet burgim ose me burgim të përjetshëm.

Sekreti shtetëror, sipas Kodit Penal, për qëllime të këtij kapitulli që trajton këto vepra, nënkupton të dhënat apo dokumentet ushtarake, ekonomike apo zyrtare të cilat janë shpallur si informata të klasifikuara me ligj apo me dispozita ose vendime tjera të organit kompetent të nxjerra në pajtim me ligjin

Kosova e ka Ligjin për klasifikimin e informacioneve dhe verifikimin e sigurisë qëllim i të cilit është “themelimi i një sistemi unik për klasifikimin dhe ruajtjen e informacioneve që kanë të bëjnë me interesat e sigurisë së Kosovës si dhe për verifikimin e sigurisë së personave që kanë qasje në këto informacione”.