ATK suspendon inspektorin e arrestuar për ryshfet

 

Administrata Tatimore e Kosovës e ka suspenduar nga puna inspektorin D. F., i cili u arrestua mbrëmë në lidhje me dyshimet për korrupsion.

D. F. u arrestua mbrëmë nga policia e Kosovës në Gjakovë, pasi dyshohet se kishte për të marrë 500 euro ryshfet.

Bashkë me të u arrestua edhe një kontabilist i cili dyshohet se i kishte pranuar këto 500 euro nga një qytetar me qëllim që t`ia dhurojë inspektorit të ATK-së në mënyrë që biznesi të mos ndëshkohej.

Kohëve të fundit kemi mjaft raste të arrestimit të inspektorëve tatimor.

Disa javë më parë nën dyshimet për korrupsion u arrestuan edhe inspektorët Gazmend Jashari dhe Adnan Jupolli.

Ata dyshohet se kishin marrë para nga një biznes me qëllim që të mos e ndëshkonin.

Me vendim të ATK-së, edhe këta inspektorë janë pezulluar nga puna.

Nga puna në ATK ishin suspenduar edhe zyrtarët Samir Ismajli dhe Safet Krasniqi. Ismajli ishte arrestuar nën dyshimet se kishte marrë 7 mijë euro nga një biznes, ndërsa Safet Krasniqi ishte suspenduar nga Administrata Tatimore e Kosvës pas akuzës për keqpërdorim të detyrës zyrtare të ngritur ndaj tij.
Safet Krasniqi ishte shef ekipe i Njësisë së Hetimeve dhe Inteligjencës në Administratën Tatimore të Kosovës.
Ai akuzohet nga Prokuroria Speciale e Kosovës se gjatë kohës sa ishte ushtrues detyre i pozitës së drejtorit të Hetimeve në ATK nuk kishte ndërmarrë asnjë aktivitet kontrolli, apo vizitë duke e dëmtuar kështu qëllimisht buxhetin e Kosovës.
Sipas aktakuzës, Safet Krasniqi i kishte autorizuar disa zyrtarë të ATK-së për të vizituar disa biznese dhe për t’ua korrigjuar deklarimet tatimore, ndonëse për to kishte deklarime se punonin me fatura të dyshimta.