ATK konfiskon 500 mijë euro nga tatimpaguesit borxhlinj
Administrata Tatimore e Kosovës gjatë kësaj javë ka zhvilluar aksione në lokacione të ndryshme për konfiskimin e pasurisë së tatimpaguesve borxhlinj.
Procedura e konfiskimit në bashkëpunim me Policin e Kosovës, është zhvilluar ndaj gjashtë (6) tatimpaguesve sipas planit paraprak, ndërsa, vlera e mallrave dhe pasurisë së konfiskuar është 500,000 euro.
“Si rezultat i shumë aktiviteteve intensive që administrata tatimore është duke ndërmarr, kemi trend pozitiv të zvogëlimit të borxheve, të cilat kanë reflektuar në rritjen e të hyrave. Përveç konfiskimit të pasurisë, aksioni në fjalë do të shtrihet edhe në mbledhjen e të gjitha gjobave mandatore, të cilat janë të pa-paguara”, thuhet në komunikatë.
Përmes komunikatës ATK ka njoftuar se aksionet e ngjashme do të vazhdojnë edhe gjatë ditëve në vijim dhe kanë kërkuar nga të gjithë tatimpaguesit borxhlinj që t’i kryejnë me kohë obligimet tatimore, në mënyrë që të mos bëhen objekt i ndëshkimeve dhe i procedurave të mbledhjes së detyrueshme.