Foto: Urim Krasniqi/KALLXO.com

Arsyetimi i Armend Zemajt pse Kosova nuk e siguroi ende asnjë vaksinë

Ministri në detyrë i Shëndetësisë, Armend Zemaj, ka folur lidhur me procesin e bisedimeve për sigurim të vaksinave kundër COVID-19.

Ai në emisionin “Kallxo Pernime” ka thënë se kanë filluar qysh nga muaji korrik të bisedojnë, duke mos lënë anash edhe blerjen direkte.

“Angazhimi ynë ka qenë që kur u licencuan vaksinat për përdorim, secili hap që është dashur të merret ka filluar shumë herët, pothuajse në muajin korrik. Edhe përmes mekanizmit së pari COVAX, por edhe përmes interesmit tonë që të bëhemi pjesë e blerjeve direkte nga prodhuesit e parë që do merrnin licencën. Hapat janë përshpejtuar në shtator-tetor dhe ne kemi arritur që në dhjetor të ulemi të diskutojmë, të arrijmë diskutim me kompaninë Pfizer para se të fillojë vaksinimi nëpër botë”, ka thënë Zemaj.

Zemaj tutje ka thënë se fakti që Kosova nuk është pjesë e OBSH-së dhe BE-së e ka bërë këtë proces më të vështirë.

Për mënyrën e parapagimit Zemaj tha se ka qenë më shumë e mundur për vende të BE-së, ku e kanë përcjellë si hap përmes dy shteteve.

“Në fillim të negociatave është dashur të nënshkruhet një kontratë konfidencialiteti që e ka secili shtet për përmbajtje të disa rregullave. Ju e dini se Kosova nuk është pjesë e Organizatës Botërore të Shëndetësisë, parapagimi ka qenë për vende të BE-së, por ne e kemi përcjellur edhe këtë hap përmes dy shteteve, kemi tentuar përmes Polonisë e cila na është afruar në emër të BE-së, për të siguruar blerjen dhe përmes Austrisë, e cila na ka siguruar që në momentin kur në treg, në muajin mars kur edhe pritej, ne jemi dakorduar për blerjen e 600 mijë dozave. Sa i përket metodës së parapagimit, fondet të cilat janë ndarë nga Komisioni Evropian, dakordimi ka qenë që të barten tek një shtet anëtar i BE-së dhe të sigurohet kjo pjesë e vaksinave, kjo është ende në proces”, ka thënë Zemaj.

Zemaj sqaroi edhe vonesën e vaksinave nga kompania Pfizer. Sipas tij, të gjitha kushtet nga ana e Kosovës kanë qenë të plotësuara por Pfizer kishte ndërprerë komunikimin për arsye të paqarta.

“Data finale ka qenë 30 dhjetor 2020, ku në konfirmimin nga Pfizer thuhej se ashtu si na kanë premtuar, ku ne kemi kërkuar 2.4 milionë doza, se 11 mijë e 700 doza do t’i kishin në pjesën e fundit të muajit shkurt 2021, 13 mijë 650 doza në pjesën e dytë pas muajit mars. Mbi 2.3 milionë doza do i kishim të alokuara në pjesën e dytë të vitit 2021. Më 5 janar i kanë dërguar kushtet dhe kriteret që ne duhej t’i plotësonim. Në interesin e tyre është mirëmbajtja e vaksinës, këto ne i kemi pasur të plotësuara. Ne këto i kemi dorëzuar të gjitha. Më datë 8 janar, në një konfirmim tjetër, unë me ekipin jemi dakorduar të kërkojmë 500 mijë doza në pjesën e dytë të vitit dhe 35 mijë t’i marrim nga këto që ishin të siguruara deri në qershor. Ne kemi kërkuar konfirmim prej tyre, nëse Kosova i ka dozat të siguruara dhe ata na kanë thënë po. Pas datës 8 janar, komunikimi ka ndryshuar, pra ka ngecur”, ka thënë Zemaj.

Kurse për vonesën e vaksinave përmes programit të COVAX-it, Zemaj tha se është shtyer dërgesa për shkak së Kosova nuk ka pasur gjendje shumë të rëndë epidemiologjike.

“Pjesa tjetër është lidhur me COVAX-in, kemi vazhduar me plotësimin e hapave për mbi 700 mijë doza që i kemi të konfirmuara për 20 për qind të popullatës. Këto janë vaksina që vijnë si donacion. Këta madje na kanë pemtuar për fund të muajit janar, por jemi renditur në shkurt-mars nga COVAX për shkak të gjendjes së mirë pandemike. Arsyetimi ka qenë që Kosova e ka gjendjen dhe infeksionin më të ulët dhe duhet t’u jepet prioritet disa shteteve tjera”, shtoi tutje Zemaj.