Foto: Urim Krasniqi/KALLXO.com

Arsyet pse Zyra e Prokurorit të Specializuar po e heton Haradinajn

Dhomat e Specializuara të Kosovës me seli në Hagë të Holandës kanë dhënë detaje për akuzat që po i bëhen nënkryetarit të OVL-UÇK-së, Nasim Haradinaj.

Sipas këtij institucioni të drejtësisë, Haradinaj akuzohet për veprat penale, frikësim i dëshmitareve, hakmarrje dhe shkelje të fshehtësisë së procedurës.

“Pas arrestimit të tij nga Zyra e Prokurorit të Specializuar më 25 shtator 2020, Nasim Haradinaj u transferua në objektin e paraburgimit të Dhomave të Specializuara të Kosovës në Hagë. Për të dyshuarin  është lëshuar fletarrestim për vepra penale kundër administrimit të drejtësisë, përkatësisht për frikësim të dëshmitarëve, hakmarrje dhe shkelje të fshehtësisë së procedurës, të parapara në Kodin Penal të Kosovës, sikurse përfshihen në nenin 15(2) të Ligjit nr. 05/L-53 për Dhomat e Specializuara dhe Zyrën e Prokurorit të Specializuar”, thuhet në komunikatën për media të Gjykatës Speciale.

Ende nuk është caktuar se kur Haradinaj do të paraqitet pranë gjykatësit për seancën e parë. Por, siç njoftoi Specialja, seanca publike do të mund të përcillet edhe në internet.

“Informacioni për datën dhe orën e paraqitjes së parë të Nasim Haradinajt para gjykatësit do të njoftohet më vonë. Paraqitja e parë do të bëhet në seancë të hapur dhe mund të ndiqet në transmetim me video në Internet https://ëëë.scp-ks.org/sq/transmetim, me pak vonesë në transmetim”, thuhet në fund të njoftimit.