Arrestohen dy grabitësit e dyshuar të mbi 1 mijë eurove në disa lokale në Ferizaj

Janë arrestuar dy persona të dyshuar për vjedhje në disa lokale në Ferizaj më 05.08.2024, rreth orës 22:00.

Lajmin për KALLXO.com e ka konfirmuar Drejtoria Rajonale e Policisë në Ferizaj të cilët kanë thënë që vjedhjet kanë ndodhur gjatë periudhës korrik-gusht 2024.

“Të dyshuarit: A.M ( M/K) i moshës 40 vjeçar dhe A.Q ( F/K) e moshës 24 vjeçare dyshohet se gjatë periudhës korrik-gusht të vitit 2024 kanë vjedhur para të gatshme në disa lokale të qytetit të Ferizajt” – thuhet në njoftimin e Policisë.

Në raportin e Policisë thuhet se më 31.07.2024, të dyshuarit, kanë vjedhur 1,050 euro para të gatshme në një lokal në rrugën “Driton Islami” në Ferizaj.

Me 02.08.2024 dyshohet që të njëjtit kanë vjedhur para të gatshme 150 euro në një lokal në rrugën magjistrale Ferizaj-Prishtinë dhe 60 euro para të gatshme, pije dhe cigare në  një local rrugën “Vëllezërit Gërvalla” në Ferizaj.

Ndërsa me datën 03.08.2024, thuhet që dyshohen të kenë vjedhur 100 euro para të gatshme në një lokal në rrugën “Cen Dugolli” në Ferizaj.

Të dyshuarit thuhet se janë intervistuar nga hetuesit policorë dhe me vendim të prokurorit të shtetit janë ndaluar në mbajtje për 48 orë.

“Të dyshuarit pasi janë intervistuar nga hetuesit policorë,  në prani edhe të avokatit mbrojtës, me vendim të prokurorit të shtetit janë ndaluar në mbajtje për 48 orë, për procedura tjera hetimore”- u tha në  njoftim.

Hetuesit policorë thekson PK-ja, janë duke e hetuar rastin ngaqë personat dyshohen edhe për vjedhje të tjera në periudha të ndryshme kohore.