Rasti 'Çekiçi' - 21.01.2020
Apeli kthen në rigjykim për herë të dytë rastin e rrëmbimit dhe vrasjes së Naim Hajrizit
Gjykata e Apelit ka kthyer në rigjykim procesin penal maratonik ndaj Gëzim Retkocerit, i akuzuar për vrasjen e Naim Hajrizit në fshatin Llugagji të Lipjanit në vitin 2009.
Lajmin për KALLXO.com e ka konfirmuar familjari i të ndjerit Naim Hajrizi, Fatmir Hajrizi.
Po ashtu, me 10 vjet burgim ishte dënuar edhe Osman Spahiu për ndihmën që i kishte dhënë Gëzim Retkocerit.
Prokuroria në aktakuzë theksonte se më 29 prill të vitit 2009, Gëzim Retkoceri së bashku me personin N.N. tani i panjohur për Prokurorinë dhe Gjykatën e kishin rrëmbyer Naim Hajrizin dhe e kishte mbytur duke e goditur me mjete të forta, e pastaj trupin e pajetë të lidhur në këmbë dhe duar dhe me qese najloni në kokë e kishin dërguar në një vend mes fshatit Smaliushë dhe Debratin dhe me qëllim të fshehjes së gjurmëve e kishin djegur trupin e të ndjerit.
I bashkakuzuar për vrasjen e rëndë të Naim Hajrizit ishte edhe Osman Spahiu.
Sipas Prokurorisë, i akuzuari Osman Spahiu më 30 prill 2009 me kërkesë të Gëzim Retkocerit e kishte thirrur në telefon vëllanë e Naim Hajrizit duke i thënë: “Vëllanë e ke në Shkup, mos e lyp në Polici”, edhe pse kishte njohuri se i akuzuari Gëzim Retkoceri e kishte privuar nga jeta Naim Hajrizin.
Mirëpo rrëfimi i tij para Gjykatës pas 10 viteve se Gëzimi i kishte thënë thirre vëllanë e Naim Hajrizit dhe thuaja se “vëllanë e ke në Shkup, mos e lajmëro Policinë!” e ndryshoi rrjedhën e këtij gjykimi andaj më 10 janar të këtij viti Prokuroria kishte ricilësuar veprën penale nga vrasje e rëndë në dhënien e ndihmës kryerësit pas kryerjes së veprës penale.
Gjykata e Prishtinës për këtë vrasje më 15 korrik 2015 kishte shpallur fajtorë të akuzuarit Gëzim Retkocerin dhe Osman Spahiun duke i dënuar me nga 30 vjet burgim.
Por, Apeli si shkallë e dytë më 4 maj 2016 e kishte kthyer çështjen në rigjykim dhe rivendosje për shkak se gjykata e shkallës së parë kishte shkelur dispozitat e Kodit të Procedurës Penale.
