Anulohet greva e punëtorëve teknikë dhe të sigurimit teknik të disa shkollave e qendrave të mjekësisë familjare në Prishtinë

Punëtorët teknikë, ata të sigurimit fizik të disa shkollave, qendrave të mjekësisë familjare në Prishtinë dhe punëtorët e sigurimit fizik të QKUK-së kishin planifikuar të mbajnë grevë më 03.09.2024. Por kryetari i Sindikatës së Pavarur të Sektorit Privat të Kosovës, Jusuf Azemi, ka njoftuar në konferencë për media se kjo grevë është anuluar.

Azemi ka thënë se nga Komuna e Prishtinës kanë marrë premtim që tani e tutje pagat do të jenë 400 bruto për punëtorët e këtij sektori.

“Zyrtarisht, punëtorët teknikë të shkollave të mesme nga data 01.10.2024 do të kalojnë me pagën 400 euro bruto. Ndërsa punëtorët teknikë të shkollave fillore do të marrin pagën 300 neto”- ka thënë Jusuf Azemi më 02.09.2024.

Azemi më tej ka thënë se për punëtorët teknikë të QKMF-së në Prishtinë është premtuar që nga muaji i ardhshëm paga bruto të jetë 400 euro krahasuar me 270 euro sa ka qenë më herët.

Kryetari i Sindikatës  së Sektorit Privat të Kosovës, Jusuf Azemi përmes një postimi në rrjetin social Facebook, më 28.08.2024 kishte bërë thirrje që më 03.09.2024, punëtorët teknikë dhe ata të sigurimit fizik të disa shkollave dhe të gjithave qendrave të mjekësisë familjare në Prishtinë dhe punëtorët e sigurimit fizik të QKUK-së të hyjnë në grevë.

Më 28.08.2024 Qeveria e Kosovës ka marrë vendim që paga minimale të jetë 350 euro bruto në muaj për punë me orar të plotë. Ky vendim do të hyjë në fuqi më 01.10.2024.

Ministri i Financave, Hekuran Murati, tha se vendimi është që pagesa duhet të jetë 2 euro për orë, e që përkthyer në një muaj i bie 350 euro pagë mujore.