Anëtari i Këshillit Prokurorial e quan Kryeprokuror të Shtetit Isufajn edhe pse ende s`ka dekret nga Presidentja
Anëtari i Këshillit Prokurorial të Kosovës, Ardian Hajdaraj gjatë ditës së djeshme ka publikuar një fotografi me Kryeprokurorin e Prokurorisë Speciale, Blerim Isufaj, ndërsa të njëjtën e ka përcjellë me një mbishkrim.
“Me Kryeprokurorin e R. së Kosovës z.Blerim Isufaj. Vizitë zyrtare në Oslo”- është përshkrimi i fotografisë së publikuar nga Hajdaraj në rrjetin social Facebook gjatë ditës së djeshme.
Blerim Isufaj është kandidati i propozuar nga Këshilli Prokurorial i Kosovës për Kryeprokuror të Shtetit.
Në prill të këtij viti Isufaj u nominua për Kryeprokuror të ri të Shtetit ndërsa për të votuan 11 anëtarë.
Propozimi i KPK-së është dërguar për dekretim te Presidentja Vjosa Osmani.
Deri më tani nuk ka një vendim të prerë në lidhje me rastin e Kryeprokurorit të Shtetit dhe nominimin e Isufajt në këtë pozitë.
Aktualisht Prokuroria e Shtetit është duke funksionuar me ushtrues detyre dhe në këtë pozitë është vendosur Besim Kelmendi.
KALLXO.com ka kërkuar sqarime nga Këshilli Prokurorial lidhur me postimin e Hajdarajt.
KPK në përgjigjen për KALLXO.com ka thënë se Hajdaraj e ka publikuar fotografinë në rrjetin personal të tij.
“E nderuar, anëtari i KPK-se, prokurori Ardian Hajdaraj e ka publikuar një fotografi në rrjetin personal Facebook. Ne si Këshill nuk komentojmë fotografitë dhe përshkrimet në rrjetet sociale private të z. Hajdaraj”- thuhet në përgjigjen e KPK-së.
KPK tutje thotë se qëndrojnë prapë propozimit të tyre për Kryeprokurorin e ri të Shtetit të dërguar te presidentja për dekretim.
Përveç postimit për pozitën e Kryeprokurorit të Shtetit, anëtari i KPK-së Ardian Hajdaraj ka shpërndarë fotografi edhe me anëtarë e prokurorë të tjerë të Kosovës gjatë vizitës zyrtare që janë duke e zhvilluar në Oslo.
Gjatë ditës së djeshme Këshilli Prokurorial i Kosovës ka njoftuar se janë duke zhvilluar një vizitë në Gjykatën e Qarkut në Oslo të Norvegjisë së bashku me përfaqësues të Këshillit Gjyqësor e Ministrisë së Drejtësisë.
Kjo vizitë sipas njoftimi është duke u zhvilluar qëllim të përfitimit nga shkëmbimit të përvojave dhe të praktikave të mira, sidomos nga ato që ndërlidhen me menaxhimin e shërbimeve të teknologjisë informative në fushën e drejtësisë, përfshirë edhe statistikat, analizat dhe përdorimin e informacionit, i cili ndikon në fuqizimin dhe avancimin e SMIL-it, përshkrimin e modeleve të operimit, mirëmbajtjen dhe modelet konkrete të financimit të tij, të cilat nevojiten për të mbajtur të përditësuar infrastrukturën thelbësore.
KPK e propozon Blerim Isufajn për Kryeprokuror të Shtetit – VIDEO
