Amnesty International: Ukraina 'rrezikon civilët' me bazat e ushtrisë në zonat e banuara
Janë bërë pothuajse gjashtë muaj që kur Rusia filloi pushtimin e saj në Ukrainë. Trupat e presidentit Vladimir Putin kanë pushtuar disa nga rajonet kufitare të Ukrainës dhe ditëve të fundit po i shtojnë sulmet ndaj Kievit.
Sulmi ushtarak i Moskës ka nisur në orët e para të 24-shkurtit. Raketat janë nisur në aeroporte dhe infrastrukturë ushtarake në rreth 25 qytete.
Vladimir Putin, tha se ka nisur, sipas tij, një operacion “special” për “çmilitarizimin” e Ukrainës. Veprimi i Kremlinit ka nxitur zemërim dhe është dënuar në të gjithë botën.
Shtetet e Bashkuara dhe aleatët evropianë janë përgjigjur me sanksione të ashpra si dhe me ndihmë të madhe me mjete ushtarake kundër Moskës dhe janë zotuar se do ta mbajnë Rusinë përgjegjëse për këtë luftë.
Të dhënat më të fundit të zhvillimeve në Ukrainë dje dhe gjatë natës së mbrëmshme janë si në vijim:
Ukraina u ka lëshuar disa territore në rajonin e Donbasit forcave ruse, me Kievin që ka pranuar “suksesin e pjesshëm” të Rusisë ditët e fundit. Presidenti ukrainas, Volodymyr Zelenskiy, e ka përshkruar si “ferr” presionin nën të cilin ndodhen forcat e tij në lindje të vendit. Ata kanë rimarrë dy fshatra pranë qytetit të Slovianskut, sipas gjeneralit ukrainas Oleksiy Hromov, por janë detyruar ta braktisin një minierë qymyri që konsiderohet si një pozicion kyç mbrojtës, ndërsa forcat janë shtyrë në periferi të Avdiivka.
Rusia mund të nisë një ofensivë në rajonin jugor të Ukrainës, Kherson, në përpjekje për ta rikthyer momentumin nga Kievi dhe ka qenë dukshëm duke ndërtuar forca, tha Hromov të enjten. Pjesa më e madhe e rajonit është tashmë e pushtuar nga Rusia pasi ajo pushtoi zona në fillim të pushtimit të saj, por forcat ukrainase kanë zhvilluar një kundërofensivë për ta rifituar territorin.
Tre anije të tjera që transportonin grurë janë autorizuar të largohen nga portet e Ukrainës të premten, si pjesë e një marrëveshjeje ndërkombëtare të ndërmjetësuar për t’i zhbllokuar eksportet e drithërave dhe për ta lehtësuar krizën globale të ushqimit. Anijet janë të destinuara për në Turqi, Irlandë dhe Mbretërinë e Bashkuar. Miliona tonë drithë kanë ngecur në Ukrainë që kur Rusia e pushtoi këtë vend pak më shumë se gjashtë muaj më parë.
Ukraina do të marrë një tjetër paketë financimi me vlerë rreth 8 miliardë dollarë nga Bashkimi Evropian deri në shtator, tha një burim i qeverisë gjermane për Reuters.
Kanadaja po dërgon deri në 225 forca të armatosura kanadeze në Mbretërinë e Bashkuar për të rifilluar trajnimin e rekrutëve ushtarakë ukrainas, ka njoftuar ministri kanadez i mbrojtjes. Që nga viti 2015, Kanadaja ka trajnuar 33,000 ushtarakë dhe personel të sigurisë ukrainase, por në shkurt ka ndaluar disa aspekte të trajnimit.
Tetë persona janë vrarë dhe katër janë plagosur në granatimet e artilerisë ruse në qytetin lindor të Ukrainës Toretsk në rajonin e Donetsk të enjten, tha guvernatori rajonal. Granatimet sulmuan një stacion të transportit publik ku ishin mbledhur njerëzit. Tre fëmijë ishin në mesin e të plagosurve, tha guvernatori i zonës, Pavlo Kyrylenko.
Anëtarët e NATO-s po punojnë ngushtë me kompanitë e mbrojtjes për të siguruar që Ukraina të marrë më shumë furnizime me armë dhe pajisje për t’u përgatitur për një luftë të zgjatur me Rusinë, tha të enjten sekretari i përgjithshëm i NATO-s, Jens Stoltenberg. Ai i tha Reuters në një intervistë: “Ne po ofrojmë shumë mbështetje, por duhet të bëjmë edhe më shumë dhe të jemi të përgatitur për një periudhë afatgjate.”
Një zyrtar amerikan e akuzoi Moskën se po përgatitet të vendosë prova të rreme për ta bërë të duket sikur vrasja masive e fundit e të burgosurve ukrainas në një sulm në një burg të kontrolluar nga Rusia ishte shkaktuar nga Ukraina. Kievi dhe Moska e kanë fajësuar njëra-tjetërën për sulmet në burgun në Olenivka të kontrolluar nga Kremlini, në Ukrainën lindore, javën e kaluar.
Amnesty International ka thënë se ushtria ukrainase po rrezikon jetën e civilëve duke u bazuar në zonat e banuara. Raporti është hedhur poshtë nga përfaqësuesit e qeverisë ukrainase, të cilët thonë se fajëson Ukrainën për pushtimin e Rusisë. Studiuesit e grupit të të drejtave të njeriut zbuluan se forcat ukrainase po përdornin disa shkolla dhe spitale si baza, duke qëlluar pranë shtëpive dhe ndonjëherë duke jetuar në banesa banimi. Zëvendësministrja e mbrojtjes e Ukrainës, Hanna Maliar, e akuzoi Amnesty International për “shtrembërim të pamjes reale” dhe për dështimin për të kuptuar situatën në terren./The Guardian
