Foto: Mike Pompeo/Twitter
Amerika i kërkon Vuçiqit njohje të dyanshme Serbi - Kosovë
Sekretari amerikan Mike Pompeo është takuar dje me presidentin serb Aleksandar Vuçiq në margjinat e një takimi të Këshillit të Sigurimit të Kombeve të Bashkuara në New York.
Sekretari Pompeo vlerësoi marrëdhëniet e forta SHBA-Serbi, thuhet në komunikatë.
Pompeo dhe Vuçiq diskutuan vizionin e ndërsjellë të një rajoni të qëndrueshëm, të sigurt dhe të mirëqenie të Ballkanit Perëndimor dhe vazhduan mbështetjen e SHBA për qëllimin e Serbisë për integrimin në Bashkimin Evropian.
Shtetet e Bashkuara kanë bërë thirrje për arritjen sa më parë të një marrëveshjeje midis Kosovës dhe Serbisë.
“Sekretari Pompeo inkurajoi Serbinë që të përqendrohet në këtë synim strategjik duke përshpejtuar reformat e brendshme dhe rinisjen e negociatave me Kosovën për një marrëveshje gjithëpërfshirëse të normalizimit të përqendruar në njohjen e dyanshme”, thuhet në komunikatë.
Sekretari përsëriti që të dy palët duhet të shmangin provokimet që pengojnë procesin e normalizimit, dhe të angazhohen me frymën e kompromisit dhe fleksibilitetit të nevojshëm për të siguruar një marrëveshje dhe për të zhbllokuar potencialin e të dy vendeve.
Mirëpo, bisedimet e lehtësuara nga Bashkimi Evropian janë ndërprerë që nga nëntori i vitit të kaluar, për shkak të taksës ndaj mallrave serbe të cilën e ka vendosur Qeveria e Kosovës.
Taksa, sipas zyrtarëve në Prishtinë, është ndërmarrë për shkak të fushatës kundër shtetësisë së Kosovës, që e kanë zhvilluar zyrtarët serbë.
