Ambasadori i ri i ShBA-së në Kosovë: Mezi po pres të kthehem në Prishtinë

Ambasadori i ri i Shteteve të Bashkuara të Amerikës në Kosovë, Jeff Hovenier, ka thënë se mezi pret që të kthehet në Prishtinë për të punuar në forcimin e marrëdhënieve në mes të ShBA-së dhe Kosovës.

Këtë ai e ka thënë në një postim në Twitter derisa i është përgjigjur urimit të ish-ministrit të Punëve të Jashtme të Kosovës, Enver Hoxhaj.

“Mezi pres të kthehem në Prishtinë dhe të punoj me homologët e mi nga Kosova për të forcuar dhe thelluar më tej marrëdhëniet ShBA-Kosovë”, ka shkruajtur Jeff Hovenier.

Hovenier në pozitën e ambasadorit të Shteteve të Bashkuara të Amerikës pritet të zëvendësojë ambasadorin e deritashëm Philip Kosnett.

Qysh në korrik, Shtetet e Bashkuara të Amerikës kishin bërë të ditur se Hovenier do të ishte në krye të Ambasadës së Shteteve të Bashkuara të Amerikës në Kosovë.

Thank you! I’m looking forward to returning to Pristina and working with my counterparts from Kosovo to further strengthen and deepen the U.S.-Kosovo relationship.

— Jeff Hovenier (@JHoven65) November 20, 2021