Albin Kurti takon Ditmir Bushatin në Tiranë
Ish- ministri i Punëve të Jashtme të Shqipërisë, Ditmir Bushati ka takuar liderin e Lëvizjes Vetëvendosje, Albin Kurti, në Tiranë.
Siç ka njoftuar përmes “Facebook”, Bushati tha se me Kurtin kishin një bisedë mbi sfidat që e presin Kurtin në të ardhmen.
“Me Albinin në një bisedë dje në #Tiranë mbi sfidat që e presin si Kryeministër i ardhshëm i Kosovës. Pritshmëritë janë të mëdha për të jetësuar besimin e qytetarëve të Kosovës duke sjellë një standard të ri qeverisës shumë të dëshiruar për shqiptarët kudo ku ata jetojnë, si parakusht për të kontribuar në fuqizimin e faktorit shqiptar në rajon”, ka shkruar Ditmir Bushati.
Në këtë takim, siç shihet në fotografinë e postuar nga Bushati, ishin edhe kandidati për deputet nga LVV, Haki Abazi, dhe anëtarët e kësaj partie, Boiken Abazi dhe Arbër Zaimi.
Zgjedhjet e parakohshme parlamentare të mbajtura më 6 tetor kanë nxjerr partinë e Albin Kurtit forcën e parë politike në vend me mbi 215 mijë vota.
www.kallxo.com
