Aktakuzë ndaj gjilanasit që pretendoi se e ka ilaçin për luftimin e COVID-19
Prokuroria në Gjilan ka ngritur aktakuzë ndaj të pandehurit K.A për shkak se i njëjti përmes rrjetit social ‘’Facebook’’, ka publikuar njoftimin për vënien në qarkullim të barit për luftimin e COVID-19.
Sipas prokurorisë, i pandehuri është nga fshati Përlepnicë e Gjilanit.
“Sipas aktakuzës, më 6 prill 2020, i pandehuri K.A., në fshatin Përlepnicë Komuna e Gjilanit, ka vënë në qarkullim barëra ose produkte të dëmshme mjekësore, pa iu bërë kontrolli i nevojshëm nga personi apo enti i autorizuar, në atë mënyrë që përmes rrjetit social ‘’Facebook’’, ka publikuar njoftimin për vënien në qarkullim të barit për luftimin e Corona Virusit”, thuhet në njoftimin e Gjykatës.
I pandehuri me këtë veprim ka kryer veprën penale ‘”Prodhimi dhe shpërndarja e produkteve të dëmshme mjekësore’’, nga neni 260 paragrafi 2 të Kodit Penal të Republikës së Kosovës si dhe në këtë mënyrë, i njëjti ka vepruar në kundërshtim me Ligjin për Shëndetësi 04/L-125 dhe Ligjin për Produkte dhe Pajisje Medicinale 04/L-190.