Aktakuzë kundër të dyshuarit për vrasje të rëndë në Viti

Prokuroria Themelore në Gjilan ka ngritur aktakuzë kundër të pandehurit B.R, të dyshuar për veprat penale “Vrasja e rëndë” dhe ‘’Mbajtja në pronësi, kontroll ose posedim të paautorizuar të armëve’’.

Sipas kërkesës së prokurorisë i pandehuri që nga data 13 Korrik 2021 gjendet nën masën e paraburgimit.

Sipas aktakuzës, i pandehuri B.R., më 13 Korrik 2021, me dashje ka privuar nga jeta tani të ndjerin A.R. dhe ka tentuar ta privoj nga jeta edhe të dëmtuarin B.B.

Pas një konflikti fizik, në mes tyre në Viti, ku fillimisht nga vetura del tani i ndjeri A.R., me shkop në dorë, ku në atë moment nga vetura e tij del edhe i pandehuri me armë zjarri, ku pastaj i ndjeri A.R., largohet dhe hyn në veturën e tij, mirëpo i pandehuri afrohet tek vetura, tek xhami i vozitësit ku ishte i ulur i njëjti dhe shtënë në drejtim të tij duke e goditur me katër plumba, e më pas del nga ana e pasagjerit dhe shtënë me armë pesë herë në të dëmtuarin B.B, thuhet në aktakuzë.

I ndjeri A.R., si pasojë e plagëve të marra ka ndërruar jetë duke u transportuar në Spitalin Regjional të Gjilanit, ndërsa i dëmtuari B.B. ka marrë lëndime të rënda trupore.

Gjithashtu, i pandehuri pa leje ka mbajtur në pronësi armë zjarri, të cilat iu janë sekuestruar nga Policia e Kosovës.