Aktakuza ndaj ish kryeshefit të KEK-ut, Abdixhiku: Më 9 shkurt bie mafia energjetike
Kryetari i Lidhjes Demokratike të Kosovës, Lumir Abdixhiku ka reaguar pas ngritjes se aktakuzës së Prokurorisë Speciale ndaj ish-kryeshefit të Korporatës Energjetikë të Kosovës, Nagip Krasniqi.
Ai ka përmendur edhe hetimin ndaj ambasadorit Martin Berishajt, duke thënë se të njëjtit kishin marrë mbrojtje publike nga kryeministri i Kosovës, Albin Kurti.
Abdixhiku ka thënë se më 9 shkurt bie “mafia energjetike”.
“Mafia energjetike i ka rrënjët e thella në pushtetin popullist. Prandaj dhe marrin mbrojtje publike. Prandaj dhe sulmohet Prokuroria e Media. E japin këtë mbrojtje sepse ndihen të paprekshëm. Arroganca e 51% ka krijuar këtë vetëbesim prej të fortit” – ka shkruar ai në Facebook.
Ndërsa, ka shtuar se pas 9 shkurtit, hetimet e pavarura të një sistemi juridik pa presion popullist, do të japin dritë edhe mbi të gjithë tenderët sekret.
Portimi i plotë i Abdixhikut:
MË 9 SHKURT BIE MAFIA ENERGJETIKE
– Nagip Krasniqi, i caktuar nga partia në pushtet në krye të KEK-ut, akuzohet nga Prokuroria Speciale për negocimin e një TENDERI SEKRET në vlerë prej 3.4 milion eurove.
– Ky tender sekret është negociuar kur Blloku A5 qëndronte jashtë funksionit për plot 9 muaj. Në atë kohë, gjatë dimrit, Kosova blinte rrymë nga 1 MILION EURO NË DITË; secilën ditë!
– Gjithë këtë vlerë e paguanin qytetarët e Kosovës. Sepse Qeveria, nëpërmjet Rregullatorit, kishte rritur çmimet e energjisë për 100%.
– Martin Berishaj, anipse ambasador, hetohet sot për ndërmjetësimin e bërë për blerjen e energjisë. Për këtë punë ishte shpërblyer me 2 milion euro nga GEN-I me seli në Beograd. Martin Berishaj i kishte tërhequr plot 1.5 MILION EURO para të gatshme nga njëra bankë në Prishtinë.
– Sikurse Nagipi, ashtu dhe Martini, kishin marrë mbrojtje publike nga Kryeministri – që i kishte vendosur të dy; njërin në KEK, tjetrin ambasador në Kroaci.
Mafia energjetike i ka rrënjët e thella në pushtetin popullist. Prandaj dhe marrin mbrojtje publike. Prandaj dhe sulmohet Prokuroria e Media. E japin këtë mbrojtje sepse ndihen të paprekshëm. Arroganca e 51% ka krijuar këtë vetëbesim prej të fortit.
MË 9 shkurt bie Mafia Energjetike!
Pas 9 shkurtit, hetimet e pavarura të një sistemi juridik pa presion popullist, do të japin dritë edhe mbi të gjithë tenderët sekret. Kemi ngritur mjaftueshëm fakte për 113 tenderët e tjerë SEKRET në KEK, e mbi 877 të tjerë në gjithë Qeverinë për tre vite – pothuajse nga një në ditë.
