Aksident në rrugën Mitrovicë – Prishtinë, pesë persona të lënduar

Pesë persona kanë pësuar lëndime trupore si pasojë e një aksidenti trafiku që ka ndodhur më 15.06.2024 në rrugën Mitrovicë – Prishtinë.

Lajmin për KALLXO.com e ka konfirmuar zëdhënësja e Policisë, Flora Ahmeti.

Sipas saj, në këtë aksident kanë qenë të përfshira dy vetura.

“Sot rreth orës 12:40 kemi pranuar informatën se në rrugën  Mitrovicë-Prishtinë ka ndodhur një aksident trafiku. Në këtë aksident kanë qenë të përfshira dy automjete. Si pasojë e aksidentit lëndime  trupore kanë pësuar pesë persona”- ka thënë ajo.

Ahmeti tutje ka njoftuar se me rastin po merret hetuesia nga njësiti i trafikut rrugor.