Pamje nga konferenca ‘Një komb- një gjuhë’. Foto: KALLXO.com
Akademik Qosja: Kongresi i Drejtshkrimit varrosi përpjekjet për ndarjen e shqiptarëve në dy kombe
Kongresi i Drejtshkrimit të Gjuhës Shqipe i mbajtur në Tiranë në nëntor të 1972-ës i dha fund përpjekjeve të Serbisë për të ndarë popullin shqiptar në dy kombe. Kështu tha sot akademik Rexhep Qosja gjatë fjalës së tij në hapje të Konferencës shkencore ‘Një komb- një gjuhë’, që po mbahet në Institutin Albanologjik në Prishtinë.
Kundërshtimet për gjuhën standarde shqipe, Qosja i ka quajtur separatiste dhe që cenojnë unitetin e kombit shqiptar. Ai u shpreh edhe kundër idesë që shteti i Kosovës ta ketë gjuhën e vetë standarde.
“Mjerisht këtë qëllim të dikurshëm të Serbisë për t’i ndarë shqiptarët në dy kombe, sot po përpiqen ta realizojnë disa vëllezër tanë nga Kosova e Shqipëria, që shpresoj që ky qëllim nuk do të realizohet”- tha Oosja ndër të tjera gjatë fjalës së tij.
Konferenca shkencore ‘Një Komb – një gjuhë’ po mbahet në shenjë të 50 vjetorit të Kongresit të Drejtshkrimit të Gjuhës Shqipe.
Një fjalë rasti në hyrje të konferencës e mbajti edhe drejtori i IAP-së, Hysen Matoshi.
Ai tha se Kongresi i Drejtshkrimit ishte rezultat i synimeve dhe punës sistematike të gjeneratave të tëra të studiuesve e intelektualëve që nga koha e Rilindjes Kombëtare.
Në konferencë po marrin pjesë studiues të fushave të ndryshme të albanologjisë.
Në kuadër të kësaj konference është hapur edhe një ekspozitë dokumentare për Kongresin e Manastirit, Kongresin e Drejtshkrimit.
Kongresi i Drejtshkrimit të Gjuhës Standarde Shqipe i zhvilloi punimet nga 20-25 nëntor 1972 në Tiranë.