AGK e quan ‘precedent të rrezikshëm’ thirrjen e presidentes Osmani për hetime ndaj mediave
Asociacioni i Gazetarëve të Kosovës (AGK) ka reaguar pas postimit të presidentes së Kosovës, Vjosa Osmani, lidhur me lajmet e publikuara në portale të ndryshme, të cilat kanë pretenduar se ajo ka qenë në dijeni për një mosmarrëveshje ndërmjet familjes së dorasit të rastit të mbrëmshëm dhe viktimës, S. Sadriu, i cili është axha i bashkëshortit të saj.
AGK e konsideron si një precedent të rrezikshëm e të papranueshëm thirrjen eksplicite të presidentes së Kosovës, Vjosa Osmani, për hetime ndaj medieve që thotë se janë të përfshira në ‘propagandën’ ndaj saj.
“Një një postim publik sot, Presidentja në së paku dy raste u bën thirrje, si organeve të sigurisë edhe atyre të drejtësisë, që të hetojnë median në fjalë, pas publikimit të një lajmi rreth vrasjes së një personi mbrëmë në Ferizaj. Për më tepër, akuza e përsëritur se mediat punojnë për Serbinë, është e papranueshme, dhe më e rrezikshme kur vjen nga kreu i shtetit” – ka shkruar AGK në Facebook më 17.08.2024.
Si përfundim, AGK e ka ftuar presidenten Osmani që për pakënaqësitë në lidhje me raportimin e mediave t’i drejtohet me ankesë Këshillit të Mediave të Shkruara të Kosovës (KMSHK).
“AGK-ja, e fton Presidenten Osmani që për pakënaqësitë eventuale me raportimin t’i drejtohet me ankesë Këshilli i Mediave të Shkruara të Kosovës – Press Council of Kosovo. Është punë e medieve që, duke respektuar Kodin e Etikës, sidomos për ngjarje tragjike, të bëjnë punën e tyre duke ofruar fakte e dëshmi për rrethanat e ngjarjes” – ka theksuar AGK.
S. Sadriu është personi që u vra mbrëmë, më 16.08.2024, në oborrin e një salle dasmash në Bibaj të Ferizajt.
Autori i dyshuar i këtij akti është F. Ramadani, pjesëtar i Policisë së Kosovës.
E presidentja Vjosa Osmani ka reaguar sot, më 17.08.2024, ndaj pretendimeve se ajo dhe bashkëshorti i saj, Prindon Sadriu, kanë qenë në dijeni të një rasti që mund të ketë qenë motivi i vrasjes së mbrëmshme.
Presidentja tha se ajo dhe bashkëshorti i saj nuk kan pasur asnjë njohuri e asnjë lidhje me rrethanat që shpien në vrasjen e mbrëmshme.
Vjosa Osmani tha se i ka njoftuar institucionet e sigurisë dhe është në përgatitje e sipër të të gjitha mjeteve ligjore ndaj asaj që ajo e quajti “propagandë“.
“Pasi i kam njoftuar institucionet e sigurisë dhe jam në përgatitje e sipër të të gjitha mjeteve ligjore, po e bëj publik edhe këtë reagim ndaj publikimit të propagandës së paprecedentë që ka filluar Berat Buzhala dhe media e tij, gazeta online “Nacionale”, e që po vazhdon edhe nga disa portale të tjera” – ka shkruar presidentja në profilin e saj në Facebook.
Sipas presidentes, ndërlidhja e emrit të saj dhe të bashkëshortit të saj me rastin e të premtes në mbrëmje kanë për qëllim rrezikimin e jetës së saj dhe të familjes.
“Kjo lidhje e rrejshme dhe e rrezikshme e krijuar nga këto portale, me vetëdije të plotë dhe me qëllim të rrezikimit të jetës sime dhe të familjes sime, ndërkohë që autoritetet kompetente po e hetojnë rastin, tregon tendencën e drejtpërdrejtë të tyre për rrezikim te jetës, duke na implikuar rrejshëm madje edhe në gjoja ndërhyrje në drejtësi” – thekson presidentja.
Reagimin e plotë të presidentes Osmani mund ta lexoni në këtë LINK.
