Agim Veliu: LDK ka folur, presim deklarimin e Vetëvendosjes

Nënkryetari i Lidhjes Demokratike të Kosovës, Agim Veliu ka thënë se janë në pritje të deklarimit nga Lëvizja Vetëvendosje ndaj ofertës së tyre.

Këto komente Veliu i bëri nga Velania, ku një delegacion i LDK-së ka bërë homazhe te varri i ish-presidentit Ibrahim Rugova në 14 vjetorin e vdekjes së tij.

“Ne e kemi dhënë ofertën tonë dhe jemi në pritje që Vetëvendosja të deklarohet, përndryshe ne diçka tjetër nuk kemi”, ka thënë Veliu para gazetarëve.

Sot prej orës 14:00, LDK do të mbledhë kryesinë për të diskutuar mbi zhvillimet politike, pas dekretimit të Albin Kurtit nga presidenti Thaçi si mandatar për qeverinë e re.

“Nuk mund të predikoj çka do të vendos kryesia, është çështje e kryesisë, mirëpo oferta jonë është ajo që është dhënë, është ofertë parimore edhe kryesia e LDK-së do të qëndroi aty ku është”, ka thënë kryetari i Podujevës nga LDK.

Ndryshe, dy partitë edhe pas më shumë se 100 ditë prej kur u mbajtën zgjedhjet e parakohshme, nuk kanë arritur një ujdi për bashkëqeverisje.

LDK ka kërkuar kryetarin e Kuvendit të Kosovës deri në marrjen e postit të presidentit ndërsa LVV i ka ofruar 6 ministri dhe postin e presidentit.

.