Agim Bahtiri i del në mbrojtje Xhelal Sveçlës

Anëtari i Lëvizjes Vetëvendosje, Agim Bahtiri ka thënë se qëndrimi i Xhelal Sveçlës pranë Marko Gjuriqit, ishte për ta përfaqësuar dhe mbrojtur Kosovën.

Për këtë “zhurmë” Bahtri e drejtoi gishtin nga PDK-ja.

“Shumë zhurmë për asgjë. Kjo është ajo që bëri mbrëmë e sot PDK-ja dhe velgat e saj mediale, pas prezencës së Xhelal Sveçlës në një konferencë ballkanike të ftuar nga miqt ndërkombëtar. Xhelali ishte prezent aty edhe pse ishin prezent përfaqësuesit e Serbisë, por këtë e bëri për ta përfaqësuar dhe mbrojtur Kosovën, sepse tash si parti fituese Vetëvendosje ka përgjegjësi edhe më të mëdha shtetërore. Por nuk ishte aty për ta ndarë Kosovën, siç bëri përpjekje PDK-ja dhe një pjesë tjetër e klasës politike të Kosovës për shumë kohë”, ka shkruar ai.

Bahtiri tutje u shpreh se këta që po kritikojnë janë takuar fshehtazi “për ndarjen e Kosovës deri në Mitrovicë”, ndërsa sipas tij Xhelali mori pjesë në një takim zyrtar të organizuar nga miqtë ndërkombëtarë.

“Nuk mund ta kritikojnë Xhelalin e as VV-së këta që i falen Malit të zi 8200 hektarë tokë të Kosovës. Për dallim prej tyre, Xhelali nuk ulet për të biseduar ndarjen e Kosovës, sepse ai as nuk blihet e as nuk shitet, as nuk mund të shantazhohet e as kërcënohet, sepse është i pastër si loti në aspektin privat e zyrtar. PAN-it po i dhemb se marrëveshja për koalicion do të arrihet javën që vjen, andaj nuk po lën guri pa lëvizur për ta penguar formimin e Qeverisë Kurti. Njëjtë siç dështuan ta ndalin fitoren e VV-së, ashtu do të dështojnë ta pengojnë formimin e Qeverisë Kurti”, ka thënë ai.

Në media po qarkullon një fotografi ku shihet anëtari i VV-së, Xhelal Sveçla në tavolinë me shefin e Zyrës së Qeverisë së Serbisë për Kosovë, Marko Gjuriq.

Pas publikimit të fotografisë, reagoi Sveçla.

Në sqarimin e tij, anëtari i VV-së tha se ishin pjesëmarrës në një konferencë dhe se vendet dhe tavolinat ku janë ulur pjesëmarrësit i kanë caktuar organizatorët, e jo pjesëmarrësit./21Media