Agim Bahtiri i bën thirrje Isa Mustafës: Bëje koalicionin me Albin Kurtin

Kryetari i Komunës së Mitrovicës Jugore, Agim Bahtiri dhe anëtari i Lëvizjes Vetëvendosje ka një këshillë për kreun e Lidhjes Demokratike të Kosovës, Isa Mustafa.

Ai ka thënë se është mirë që sa më shpejt të bëhet koalicioni në mes LVV-së e LDK-së.

Madje, sipas Bahtirit, nuk ka zgjidhje tjetër përveç këtij koalicioni.

“Pas kontaktit që kam pasur me shumicën e anëtarëve të Kryesisë dhe deputetëve të LDK-së, kam parë vullnetin e tyre për arritjen e menjëhershme të marrëveshjes për bashkëqeverisje”, ka shkruar ai.

“Isa Mustafa si kryetar i LDK-së duhet ta çojë në vend porosinë e partisë së tij në takimin që po zhvillon me Kryeministrin e ardhshëm të Kosovës, Albin Kurti”, deklaron i pari i komunës së “minatorëve”.

“Për hir të qytetarëve dhe shumë proceseve që na presin, Isa Mustafa bën mirë që marrëveshjen ta nënshkruaj sot ose më së largu nesër, sepse nuk ka zgjidhje tjetër përveç bërjes së koalicionit, por që kjo nuk duhet të prolongohet më shumë”, thuhet në fund të postimit të tij në Facebook.

Liderët e dy partive momentalisht janë duke zhvilluar takim lidhur me koalicionin qeverisës.