Ag Apolloni tërhiqet nga gara për anëtar të bordit të RTK-së

Shkrimtari Ag Apolloni ka njoftuar se është tërhequr nga gara për pozitën e anëtarit të bordit të Radio Televizionit Publik të Kosovës.

Apolloni ka thënë se kjo tërheqje është si shkak i angazhimeve të shumta që ka ai.

“Për shkak të angazhimeve të shumta në letërsi (shkrime, hulumtime, botime, promovime, organizime të ndryshme dhe mësimdhënie), e kam tërhequr kandidaturën time për anëtar bordi të RTK-së. Aplikimin e kam bërë ngutshëm, por tërheqjen e kam menduar ngeshëm.  Me mirënjohje të thellë për ata që ma mbushën mendjen të kandidoja dhe me respekt për të gjithë ata që e mirëkuptojnë tërheqjen tim”, ka shkruar Apolloni.

Komisioni ad-hoc për përzgjedhjen e kandidatëve për anëtarë të bordit të RTK-së, ka njoftuar se intervistimi i kandidatëve për këto pozita pritet që të fillojë të enjten.

Për tetë pozita në bordin e RTK-së kishin aplikuar 127 persona ndërkaq komisioni ad-hoc për përzgjedhjen e tyre gjatë javës së kaluar ka eliminuar disa prej tyre për mos përmbushje të kritereve të aplikimit.