Administrohen provat materiale nga prokuroria në gjykimin ndaj Andi Pajazitit
Gjykimi për vrasjen në “Bonvivant”, në të cilin i akuzuar është Andi Pajaziti, për vrasje në gjendje të tronditjes së fortë mendore, ka vazhduar me elaborimin e provave materiale lidhur me këtë rast.
Prokurorja, Nebahate Salihu ka elaboruar disa nga provat që gjenden në këtë aktakuzë.
Salihu para Gjykatës elaboroi video-inicizmet e natës kritike, më te cilat shpjegoi se si kishte filluar fjalosja e deri në përfundimin tragjik që la të vdekur Kastriot Ramadani më 04.08.2023 në këtë kafiteri në Prishtinë.
Ndër provat e tjera të cilat u elaboruan ishin edhe Raporti i këqyrjes së vendit e ngjarës, në të cilatu treguan dëmet që ishin shkaktuar nga të shtënat me armë të zjarrit. Ky raport është përpiluar pasi policia kishin dalë në vendin e ngjarjes.
Ndërsa provat e tjera vetëm u konsideruan të lexuara siç ishin: Lista e dëshmitarëve dhe foto albumi nga vendi i ngjarjes, skica e vendit të ngjarjes, raporti i ekspertit nga Agjencia Kosovare e Forenzikës, analiza e hyrjeve-daljeve dhe hartografia për Andi Pajazitin, Dukagjin Lekajn, Hisni Gecajn dhe të përfshirit e tjerë në këtë rast, ekspertiza mjekoligjore për Andi Pajazitin, raporti i autopsisë për të ndjerin Kastriot Ramadani dhe raporti njoftues 15 ditor për masat e fshehta për atë kohë dyshuarit e këtij rasti si dhe ekspertiza për gjendjen mendore për të akuzuarin Andi Pajaziti.
Video-incizimeve nga lokali “Bonvivant” që kanë kapur rastin kur ka ndodhur vrasja do të lëshohen për shikim nesër më datë 05.12.2024.
Gjykimi sot ishte paraparë që të vazhdoj me dëgjimin e dëshmitares së fundit për këtë rast, Marigona Bajrami, por që sipas gjykatës e njëjta gjendet jashtë shtetit.
Gjykimi për këtë rast është duke u udhëhequr nga Gjyqtari, Eroll Gashi.
Si ishte kryer vrasja sipas Prokurorisë?
Sipas dosjes së Prokurorisë, rasti kishte ndodhur më 04.08.2023 rreth orës 23:15, ku paraprakisht ishin të ulur i pandehuri, i cili gjendet në arrati, Dukagjin Likaj, bashkë më tani të ndjerin K.R.
Dosja përshkruan se Likaj ishte ai që e kishte ftuar të akuzuarin Andi Pajaziti të ulet te tavolina e tyre.
Pas tensionimit të situatës, sipas Prokurorisë, ishte sigurimi Hisni Gecaj ai që ishte munduar ta qetësojë situatën, por nuk kishte arritur.
Dosja e Prokurorisë përshkruan se tashmë i ndjeri K.R. e kishte sulmuar me shishe dy herë në kokë të akuzuarin Pajaziti.
Pas këtij sulmi, i akuzuari e kishte nxjerrë armën nga brezi nga ana e djathtë, për shkak të tronditjes së fortë mendore, siç përshkruhet në aktakuzë “pa fajin e tij, pa menduar për pasojat”, shtie më armë zjarri me ç’rast e godet tashmë të ndjerin K.R.
Sipas dosjes së Prokurorisë, armën e kishte nxjerrë edhe Dukagjin Likaj, gjatë kësaj kohe ia kishte mbajtur dorën sigurimi Hisni Gecaj, kurse arma ishte e drejtuar në drejtim të të akuzuarit Pajaziti.
Dosja thotë se Dukagjin Likaj ka shtënë me armë në drejtim të të pandehurit Pajaziti me ç’rast e “ka lënduar në bërrylin e dorës së majtë” dhe si të tilla bëjnë pjesë në lëndime të rënda trupore me pasoja të përhershme shëndetësore.
Vdekja e K.R., sipas Prokurorisë, ka ardhur si pasojë e gjakderdhjes së brendshme dhe të jashtme e cila ka çuar në shok hemorragjik, si pasojë e predhës së armës së zjarrit.
Arma e cila është përdorur, sipas Prokurorisë, është tip “Smith” e kalibrit 9mm.
Për këtë, i akuzuari përveç kryerjes së vrasjes, akuzohet edhe për armëmbajtje pa leje.
Pajaziti është duke qëndruar nën masën e paraburgimit. Pajazitit i ishte shqiptuar masa e paraburgimit më 07.08.2023, së bashku me të dyshuarit, Hisni Gecaj dhe Gëzim Zakuti.
Por Gecaj dhe Zakuti ishin liruar nga kjo masë pas kërkesës së Prokurorisë.
Sipas Prokurorisë në këtë rast në rrezik ishin jetët edhe të personave të tjerë të cilët kishin pësuar lëndime trupore nga predhat e armëve të zjarrit.
Të plagosur të tjerë kishin mbetur edhe Andi Pajaziti e Hisni Gecaj ndërsa plagëve të armës së zjarrit nuk kishte arritur t’u mbijetonte K.R., i cili kishte vdekur në QKUK.
13 persona sipas Prokurorisë ishin lënduar nga gotat e thyera të qelqit gjatë përpjekjes për t’u larguar nga vendi i ngjarjes.
Të gjitha raportimet e tjera lidhur më këtë rast, mund t’i lexon në këtë LINK.
