Abdixhiku u bën thirrje qytetarëve të Luginës të marrin pjesë në regjistrimin e popullsisë në Serbi

Kryetari i Lidhjes Demokratike të Kosovës, Lumir Abdixhiku, së bashku me nënkryetarin, Lutfi Haziri, ka pritur në takim udhëheqësit partiakë dhe institucionalë të shqiptarëve të Luginës.

Abdixhiku ka bërë të ditur se në këtë takim u bisedua për gjendjen e shqiptarëve në Preshevë, Bujanoc dhe Medvegjë.

Nga ky takim, sipas kreut të LDK-së, dolën me apel të përbashkët që shqiptarët e këtyre vendeve të marrin pjesë në regjistrimin e popullsisë.

Sipas tij, marrja pjesë në këtë proces është përgjigje ndaj diskriminimit strukturor ndaj shqiptarëve të Luginës, si dhe kontribut për avancim të të drejtave të tyre.

Më poshtë gjeni njoftimin e plotë të Lumir Abdixhikut:

“THIRRJE PËR REGJISTRIM PAS TAKIMIT TË PËRBASHKËT ME LIDERËT E LUGINËS

Sonte, në Prishtinë, së bashku me nënkryetarin e LDK-së, Lutfi Haziri, kam pritur në darkë pune të gjithë udhëheqësit partiak dhe liderët institucional të shqiptarëve të Luginës.

Së bashku me kryetarin e PVD-së dhe deputetin, z. Shaip Kamberi; kryetarin e Alternativës për Ndryshim dhe kryetarin e Komunës së Preshevës, z. Shqiprim Arifi; kryetarin e PD-së dhe kryetarin e Komunës së Bujanocit, z. Nagip Arifi; kryetarin e Këshillit Kombëtar Shqiptar, z. Ragmi Mustafi; kryesuesin e Kuvendit Komunal në Preshevë, z. Sami Salihu; kryetarin e LPD-së z. Shqiprim Musliu; kryetarin e AFEDS, z. Muharrem Salihu; dhe kryetarin e VATRA-s, z. Kushtrim Kadriu – biseduam mbi gjendjen e shqiptarëve në Preshevë, Bujanoc e Medvegjë.

Nga ky takim, dolëm dhe me apel të përbashkët për të gjithë shqiptarët e kësaj ane – ata që jetojnë në Luginë, Kosovë e Mërgatë – që të marrin pjesë në procesin e regjistrimit të popullsisë në tre komunat shqiptare. Regjistrimi masiv është përgjigje ndaj diskriminimit strukturor ndaj shqiptarëve të Luginës, siç dhe është kontribut patriotik në avancimin e të drejtave autoktone të shqiptarëve të Luginës.

Si LDK, do të angazhohemi me të gjitha kapacitetet tona politike në unifikimin e spektrit politik shqiptar në çështjet me interes kombëtar; për të drejtat politike dhe civile të shqiptarëve të kësaj ane që sot jetojnë në Kosovë – me theks sigurimin e nënshtetësisë; si dhe ndihmesën shtetërore për banorët e komunave në fjalë”.